16.01.2014

СОЛИҚ СОҲАСИДАГИ ЯНГИЛИК ВА ЎЗГАРИШЛАР

халқимиз даромадини оширишга хизмат қилади

Пойтахтимиздаги «Ўзэкспомарказ»да Давлат солиқ қўмитаси ташаббуси билан Молия вазирлиги ва Бош прокуратура ҳамкор­лигида 2014 йилда солиқ қонунчилигига киритилган ўзгартиш ва қўшимчалардан кенг жамоатчиликни хабардор қилиш мақсадида кўргазмали семинар ташкил қилинди.

Ўтган йилнинг якунида солиқ ва бюджет сиёсатининг асосий йўналишлари доирасида бир қатор муҳим ҳужжатлар қабул қилинди.

Жумладан, 2013 йил 25 декабрда Президентимизнинг «Ўзбекистон Республикасининг 2014 йилги асосий макроиқтисодий кўрсаткичлари прогнози ва Давлат бюджети параметрлари тўғрисида»ги Қарори қа­бул қилинди. Қарорга асосан, жисмоний шахслардан олинадиган даромад солиғининг қуйи шкаласи бўйича солиқ ставкаси 8 фоиздан 7,5 фоизга туширилди. Шунингдек, якка тартибдаги тадбиркорлардан олинадиган қатъий белгиланган солиқ ставкалари асосан 2013 йил даражасида сақлаб қолинган ҳол­да бошқа аҳоли пунктларида (қиш­­лоқ жойларда) газета, журнал ва китоб маҳсулотлари билан чака­на савдо қилувчи якка тар­тибдаги тадбиркорлар учун қатъий белгиланган солиқ ставкаси жорий йил 1 январдан бош­­лаб, энг кам иш ҳақининг 2 баро­баридан 0,5 бараварига пасайтирилди. Бунда қатъий белгиланган со­лиқ ставкаси йил бошига, яъни 2014 йилнинг 1 январига бел­­ги­ланган энг кам иш ҳақи (96105 сўм) миқдоридан келиб чиқиб аниқланиши ва йил даво­мида энг кам иш ҳақи миқдори ўзгарган тақдирда қайта кўриб чиқилмаслиги белгилаб қўйилди.

Шунингдек, жорий йилдан бош­лаб, жисмоний шахслар томони­дан мол-мулк­ни ижарага бериш тартибига ҳам ўз­гартишлар киритилди ва ижара ҳақи­нинг ойлик энг кам миқдорлари ўрнатилди. Жумладан, жисмоний шахслар томонидан турар-жойни ижарага беришда 1 кв. метр учун Тошкент шаҳрида — 3000 сўм, Нукус шаҳри ва вилоятга бўйсунувчи шаҳарларда — 2000 сўм ва бошқа аҳоли пунктларида 1000 сўм энг кам ижара ҳақи миқдорлари белгиланди. Шу билан бирга нотурар жойларни ижарага беришда ҳам шундай тартиб жорий этилди. 1 кв. метр учун Тошкент шаҳрида — 6000 сўм, Нукус шаҳ­ри ва вилоятга бўйсунувчи шаҳарларда — 4000 сўм ва бошқа аҳоли пунктларида — 2000 сўм миқдорида белгиланди.

Енгил автомобилларга (йў­ловчилар, юк ташиш учун мўл­жалланган ва ўриндиқлари сони ҳайдовчини ҳисобга олмаган ҳолда 8 та жойдан кўп бўлмаган автотранспорт воситаси) 1 автотранспорт воситаси учун — 220 минг сўм, микроавтобуслар, автобуслар ва юк автомобилларга эса 1 автотранспорт воситаси учун — 430 минг сўм миқдорида белгиланди.

Бундан ташқари, жорий йилдан бошлаб юридик шахслардан олинадиган фойда солиғи ставкаси 9 фоиздан 8 фоизга пасайтирилди. Микрофирмалар ва кичик корхоналар учун ягона солиқ тўловчининг 2013 йилдаги ставкаси сақлаб қолинди.

Хизмат кўрсатиш соҳаси субъ­­ектлари учун пластик карталар қўлланиб, ҳақ тўланган ҳолда кўр­сатилган хизматлар ҳажми бў­йича белгиланган ставкани камайтириш 2013 йилдаги 10 фоиз ўрнига 5 фоиз миқдорида белгиланди. Асосий воситаларни ҳар йили мажбурий қайта баҳолаш бекор қилиниб, уларни ҳар уч йилда бир марта ўтказиш жорий қилинди.

2013 йил 26 декабрдаги «Ўз­бекистон Республикаси Президентининг айрим Фармонла­ри­га ўзгартишлар киритиш тўғри­сида»ги Фармонига муво­фиқ Президентимизнинг айрим Фар­монларига ўзгартишлар киритилиб, солиқ имтиёзлари муддатлари узайтирилди.

Президентимизнинг 2010 йил 30 март­даги «Халқ бадиий ҳу­нармандчилиги ва амалий санъа­тини ривожлантиришни янада қўллаб-қувватлаш тўғрисида»ги Фармон бўйича уй шароитида халқ бадиий ҳунармандчилиги ва амалий санъа­ти буюмлари ишлаб чиқарадиган якка тартибдаги тадбиркорларга ва оилавий корхонага белгиланган солиқ имтиёзлари 2017 йилнинг 1 январигача қўлланилади.

2006 йил 5 январдаги «Йирик саноат корхоналари билан касаначиликни ривожлантириш асосидаги ишлаб чиқариш ва хизматлар ўртасида кооперацияни кенгайтиришни рағбатлантириш чора-тадбирлари тўғрисида»ги Фармонга асосан меҳнат шартномаси асосида касаначиларга тў­ланадиган маблағларга тенг миқ­дорда меҳнатга ҳақ тўлаш фонди­дан ягона ижтимоий тўловни тў­лашдан озод қилиш 2019 йилнинг 1 январигача жорий қилинди.

Солиқ кодексининг 305, 311 ва 370-моддаларига киритилган ўзгартиш ва қўшимчалар, юридик шахс ташкил этмаган ҳолда оилавий тадбиркорлик шаклидаги фаолиятни амалга оширувчи оилавий тадбиркорлик субъ­ектининг қатъий белгиланган солиқ ва суғурта бадалларини ҳисоблаб чиқариш ва тўлашнинг ўзига хос хусусиятларини белгилайди.

Шунингдек, семинарда Тошкент шаҳри ва Тошкент вилоятида фаолият юритувчи хўжалик субъектлари вакиллари томонидан берилган саволларга масъул ходимлар томонидан батафсил жавоб берилди.

Тадбирда солиқ мажбуриятларини ўз вақтида адо этиб келаётган намунали солиқ тўловчиларнинг бир гуруҳига Давлат солиқ қўмитасининг фахрий ёрлиқлари топширилди.

Тоштемир ХУДОЙҚУЛОВ,

«Ўзбекистон овози» мухбири.



DB query error.
Please try later.