24.12.2013

ЖАҲОН ЧЕМПИОНИ БЎЛМОҚЧИМАН...

Одатда, қобилиятли кишиларда дастлабки муваффақият анча барвақт қўлга киритилади. Буни иқтидорли спортчи, ўн етти ёшли Ҳилола Бадалова мисолида ҳам кўришимиз мумкин. Чунки у шотокан-каратэ-до билан астойдил шуғулланаётганлиги боис, эришаётган ютуқлари тобора ортиб бормоқда.

Бугунги кунда мухлислар Ҳилола Бадаловани кўп карра мамлакат чемпиони, икки бор жаҳон чемпионатининг кумуш медали сов­риндори сифатида яхши билишади. У шу йил Бурса (Туркия)да ўтказилган Жаҳон кубоги баҳс­ларида ҳам кумуш медаль соҳибаси бўлди.

Истеъдодли спортчи юрти­мизнинг таниқ­ли мураббийларидан би­ри Хўжамқул Хўжақулов раҳбарлигида ўз маҳора­тини оширмоқда. Устозининг кунлардан бирида унга қарата айтган гаплари ҳамон ёди­да. «Эслаб қол, сенда қобилият бор, аммо қобилият — қимматбаҳо тошга ўхшайди. Тош ёниши учун унга жиддий сайқал бериш лозим».

Ҳилола ўз маҳоратини оширишга астойдил интилмоқда. Гоҳида машаққатли машғулотлардан сўнг, уйга базўр етиб келса-да, ғалабага бўлган иштиёқи чарчоқларини тарқатиб юбо­ради.

— Айни пайтда Тошкент тўқимачилик ва енгил са­ноат инс­титути қошидаги академик лицейда таҳсил оляпман, — дейди Ҳилола Бадалова. — Дарсларни аъло баҳоларга ўзлаштиришга интиламан. Рус, немис ҳам­да инглиз тил­лари­ни пухта ўрганишга ҳаракат қилаяпман. Қанча кўп тил билсанг, дўстларинг ҳам шунчалик кўп бўлади. Бунга бир неча бор жаҳон чемпионатлари ва бошқа халқаро мусобақаларда қатнашган чоғимда гувоҳ бўлганман. Бундан ташқари, тикиш ва тўқиш ишларини мукаммал ўзлаш­тириш ниятидаман. Тасвирий санъат эса жону-дилим.

Эътиборли жиҳати, Ҳилола анъанавий «Тўмарис — 2013» республика танлови ғолиби саналади. У мамлакат миқё­сида тўрт юз нафардан зиёд иштирокчи орасида тенгсиз эканлигини на­моён этди.

— Спорт аллақачон ҳаё­тимнинг ажралмас қисмига айланиб улгурган, — дейди у. — Бундан олти йил илгари илк маротаба шотокан-каратэ-до машғулотига борган эдим. Дастлабки са­боқларни мураббий Темур Мироқиловдан олганман. Мамлакат чем­пионатларида муваффақиятли иштирок этишимда ва Ўзбекистон тер­ма жамоаси таркибидан жой олишимда у кишининг хизматлари катта. Икки йилдир­ки, ўз ишининг устаси бўл­ган мутахассис Хўжам­қул Хўжақулов қўл остида халқаро мусобақаларда қатнашиб келаяпман. Мақсадим — жаҳон чемпиони бў­либ, Ўзбекистонимиз шуҳратига шуҳрат қўшиш.

Ҳилола Бадалованинг спортда эришаётган ютуқларида унинг оила аъзо­ларининг ҳам муно­сиб ҳиссаси бор, албатта. Отаси Турсунбой Бадаловнинг кас­би — меъмор, онаси Аржуманд ­Бадалова эса муҳандис-иқтисодчи. Ўз вақтида отаси футбол, онаси енгил атлетика билан шуғулланган. Бугун Ҳилоланинг 14 ёшли укаси ҳам спорт билан шуғулланади.

Бир сўз билан айтганда, Бадаловлар оиласи чина­кам спортчилар оиласидир. Спорт бу оила фарзандларининг соғлом ва баркамол бўлиб улғайишига хизмат қилмоқда.

Татьяна КИСТАНОВА



DB query error.
Please try later.