21.12.2013

ДАСТУРГА ТАКЛИФЛАРИМИЗ БОР

— дейишди сайловчилар вакиллари 47-Чортоқ сайлов округидан Олий Мажлис Қонунчилик палатаси депутати, ЎзХДП фракцияси аъзоси Дилбар Холиқова билан учрашув-мулоқотда

Шу кунларда Олий Мажлис Қонунчилик палатаси депутатларининг жойларда аҳоли билан учрашувлари бўлиб ўтаяпти. Уларда мамлакатимизда амалга оширилаётган ўзгаришлар, муҳим ижтимоий-сиёсий воқеалар, қонунчилигимиздаги янгиликлар ҳақида фикр-мулоҳаза алмашилаяпти. Парламентимиз қуйи палатасида муҳокама этилаётган қонунлар лойиҳалари юзасидан кўплаб таклифлар ўртага ташланаяпти.

Депутатнинг сайловчилар билан учрашувлари туман молия бўлимидан бошланди. «Мучум» шаҳарча фуқаролар йиғини, Чортоқ педагогика коллежи, «Ўзбекистон» маҳалла фуқаролар йиғини ва НамДУ қошидаги 3-академик лицейда давом этди.

Учрашувларда Дилбар Холиқова Обод турмуш йилида амалга оширилаётган ишлар, Конституциямиз қабул қилинганлигининг 21 йиллигига бағишланган тантанада Президентимиз томонидан қилинган маърузада белгилаб берилган вазифалар ҳақида тўхталди. Дунёнинг кўпгина мамлакатлари иқтисодий инқироз гирдобидан қутилолмаётган бир пайтда Ўзбекистонимизда барча соҳалар ривожланиб бораётгани, давлат бюджетининг 60 фоизи ижтимоий соҳага йўналтирилаётгани халқимиз ҳаётини янада яхшилашга хизмат қилаётганига эътибор қаратди.

— Президентимиз томонидан «Обод турмуш йили»нинг мантиқий давоми сифатида 2014 йилни «Соғлом бола йили» деб эълон қилиниши ҳамда бундан катта-катта мақсадлар кўзда тутилаётгани, албатта, ҳаммамиз учун қувончли ва айни пайтда зиммамизга катта масъулият юклайди, — деди у. — Айниқса,  депутатлар ҳақида билдирилган танқидий фикрлар биздан ҳаётни янада чуқурроқ ўрганишни талаб этмоқда. Бундай учрашувлар эса муаммоларни, сизларнинг таклифларингизни ўрганишга имкон беради.

Учрашувларда сайловчилар фаол иштирок этди.

Депутатнинг аҳоли вакиллари билан тез-тез учрашиб туриши қонунларимизда халқ иродасининг чуқур ифодаланишида муҳим аҳамиятга эга, — деди Чортоқ педагогика коллежи ўқитувчиси Адҳамжон Болтабоев.Шу имкониятдан фойдаланиб, қабул қилинадиган ­«Соғлом бола йили» Давлат дас­турига таклиф билдирмоқчиман.

Мактаблардаги ошхоналарда таомлар сифатини назорат қилиш, моддий ёрдамга эҳтиёжманд оилалар фарзандларини ҳисобга олиб, нархларни белгилаш тартиби кўриб чиқилса, мақсадга мувофиқ бўларди.

Менинг дастурга билдирадиган таклифим ота-оналик мақомига доир, — деди Дилара Жўраева.Президентимиз маърузасида «Соғлом бола, аввало, соғлом ва аҳил оиланинг мевасидир» деб таъкидлади. Болаларимизнинг нафақат жисмоний, балки мафкуравий ва маънавий соғломлигига ҳам эътибор қаратди. Аммо аксарият ҳолларда бола тарбияси ўқув юртларига, мактаб, мактабгача таълим муассасалари ходимларига юклаб қўйилади. Фарзандининг тар­бия­сига етарли эътибор бермайдиган, қай­ғурмайдиган ота-оналарга ҳам масъулият ва жавобгарлигини оширадиган тартиблар жорий этиш дастурда инобатга олиниши керак, деб ҳисоблайман.

Депутат ўз сайлов округидаги учрашувлар жараёнида Чортоқ туманидаги маиший хизмат касбунар коллежини ўтган ўқув йилида битирганларнинг иш билан таъминланганлик ҳолати бўйича мониторинг ўтказди. Шунингдек, «Чортоқ ҳақиқати» газетасида олдиндан эълон қи­линганидек, ЎзХДП туман кенгашининг Жамоатчилик қабулхонасида партия фаоллари, мутахассислар иштирокида электорат вакилларини қабул қилди. Уларга ҳуқуқий маслаҳат ва амалий кўмак берилди.

Носиржон ДЕҲҚОНОВ,

«Ўзбекистон овози» мухбири.



DB query error.
Please try later.