21.12.2013

МУТАСАДДИ ТАШКИЛОТЛАР РАҲБАРЛАРИНИНГ

ҳисоботларини эшитиш амалиётидан янада кенгроқ фойдаланиш зарур

ЎзХДП Тошкент шаҳар кенгаши томонидан ўтказилган навбатдаги семинарда партия ташкилотлари ва депутатлик гуруҳининг фаолиятини кучайтириш масалалари ­муҳокама қилинди.

Унда партиянинг шаҳар ва туманлар, «Ёшлик» талабалар шаҳарчаси кенгашлари раислари, халқ депутатлари шаҳар Кенгашидаги депутатлик гуруҳи аъзолари ҳамда партия фаоллари иштирок этди.

Тадбирда асосий эътибор Давлатимиз раҳбарининг Конституциямиз қабул қилинганининг 21 йиллигига бағишланган тантанали маросимдаги маърузаси мазмун-моҳиятига қаратилиб, ундан келиб чиқадиган асосий вазифалар тўғрисида фикр-мулоҳазалар билдирилди. Шунингдек, «Соғлом бола йили»да партия ташкилотлари ва депутатлик гуруҳлари фао­лиятини кучайтириш юзасидан таклифлар ўртага ташланди.

— Юртимизда инсон ҳуқуқ ва манфаатларини ҳимоя қилиш, соғлом ва баркамол авлодни вояга етказиш борасида изчил ислоҳотлар амалга оширилмоқда, — деди ЎзХДП Тошкент шаҳар кенгаши раиси, халқ депутатлари шаҳар Кенгашидаги депутатлик гуруҳи раҳбари Учқун ­Шойимқулов. —  2014 йил мамлакатимизда «Соғлом бола йили» деб эълон қилиниши замирида ҳам ана шу эзгу мақсад мужассам. Келгуси йил давлат ва жамият олдида турган вазифалар кўлами сиёсий партиялар ҳамда уларнинг депутатлик гуруҳлари зиммасига  катта масъулият юклайди.

Биз ижтимоий-сиёсий ва иқтисодий тараққиётнинг аниқ устувор йўналишларини белгилаб олишда, ислоҳотлар самарадорлигини оширишда янада фаол иштирок этишимиз зарур. Бунинг учун партия ташкилотлари ва депутатлик гуруҳлари ҳамкорлигини мустаҳкамлаш, электорат манфаатини ҳимоя қилишга қаратилган ташаббусларни кўпайтириш, муҳим ижтимоий масалалар бўйича депутатлик назоратини ҳар бир ҳудудда изчил йўлга қўйишимиз керак бўлади.

— Электорат манфаатлари билан боғлиқ иқтисодий ва ижтимоий вазифаларни ҳал этиш бўйича ишга солинмаган имкониятлар ҳали жуда кўп, — деди халқ депутатлари Тошкент шаҳар Кенгашидаги ЎзХДП депутатлик гуруҳи аъзоси Сотиволди­ Бобоқулов. — Шундан келиб чиқиб, депутатлик гуруҳимиз аъзолари депутатлик сўрови асосида электоратимиз учун устувор бўлган ижтимоий масалаларни чуқур ўрганиб, улар юзасидан маҳаллий ижро ҳокимияти органлари раҳбарларининг ҳисоботлари эшитувини ташкил этишга эътиборни кучайтирди. Айтиш мумкин бўлса, бу фаолиятимизнинг устувор йўналишига айланди. Жорий йилда иш ўринлари ташкил этиш ва аҳоли бандлигини таъминлаш масалалари бўйича Тошкент шаҳар Меҳнат ва аҳолини ижтимоий муҳофаза қилиш бош бош­қармаси раҳбарининг ҳи­соботи тингланди. Шу асосда иш ўринлари ташкил этиш билан боғлиқ масала халқ депутатлари шаҳар Кенгаши сессиясига киритилди. Келгуси йилда бу амалиётдан янада кенг­роқ фойдаланиш, манзилли ижтимоий ҳи­моя тизимини такомиллаштириш бўйича янги ташаббуслар билан чиқиш зарур, деб ҳисоблайман.

Тадбир қатнашчиларининг қайд этишича, ижтимоий-сиё­сий ислоҳотлардан аҳо­лини кенг хабардор қилиш мақсадида келгуси йилда мақсадли ахборот-тушунтириш ишларини кучайтириш керак. Бунинг учун сиёсий ва фуқаролик маърифати тизимидаги ўқувларни таъсирчан усулларда олиб бориш зарурлиги айтилди.

Семинар сўнгида таклиф ва тавсиялар умумлаштирилиб, партия ташкилотлари ҳамда депутатлик гуруҳи зиммасига аниқ вазифалар юклатилди.

ЎзХДП Тошкент

шаҳар кенгаши Матбуот хизмати.



DB query error.
Please try later.