28.11.2013

БПТ ФАОЛИЯТИ КУЧАЙИШИ УЧУН

туман партия кенгаши, депутатлик гуруҳи улар билан тизимли иш олиб бориши зарур

Наманган вилоятининг Косонсой туманида Ўзбекис­тон Халқ демократик партиясининг 55 та бошланғич ташкилоти мавжуд. Уларда 2671 нафар аъзо бирлашган. Туман партия кенгаши ЎзХДП дастурий мақсадларини амалга ошириш, ғоя ва мафкурасини оммалаштириш, электорат манфаатини ҳимоя қилиш бўйича бошланғич ташкилотлар фаолиятини янада такомиллаштиришга алоҳида эътибор қаратаяпти.

Яқинда бу ерда ўтказилган давра суҳбатида ана шу муҳим масала яна бир бор муҳокама қилинди.

— Бошланғич ташкилот қаерда, қайси корхона ёки идора қо­шида фаолият кўрсатишига қа­раб, ҳар бири билан алоҳида иш олиб боришга ҳаракат қилаяпмиз, — дейди Косонсой туман пар­тия кенгаши раиси ўринбосари Анзират Абдуллаева. — Мисол учун, яқинда тиббиёт муасса­са­ларида тузилган бошланғич таш­килотлар билан режали тадбирларни ўтказиб келаяпмиз. Жамиятда тиббий маданиятни ривожлантириш, тиббиёт соҳасида электорат ман­фаатини ҳимоя қилиш бўйича жойларда учрашувлар, давра суҳбатлари ташкил этилди. Бундай ишларни янада кўпайтириш учун, аввало, бошланғич ташкилотлар етакчиларининг ташаббускорлигини ошириш муҳим аҳа­миятга эга. Айни пайтда бош­ланғич ташкилотларимизнинг кўп­чилигида салоҳиятли етакчилар иш олиб бораяпти. Баҳористон қишлоқ врачлик пунктидаги бош­ланғич партия таш­килоти етакчиси Муҳаррамхон Қўчқорова яқинда вилоятда «Энг намунали бошланғич ташкилот етакчиси», деб топилди. Биз ҳозир бу ташкилот тажрибасини омма­лаштириш режасини тайёрлаяпмиз.

— Депутатлар ва партия фаоллари иштирокида БПТда ўт­казилаётган амалий семинарлар, тарғибот-ташвиқот ишлари яхши самара бераётир, — дейди ҳудудий партия ташкилоти етакчиси Насиба Ҳайдарова. — Шу йил бошланғич ташкилотимиз ташаббуси билан туман партия кенгаши ва халқ депутатлари туман Кенгашидаги ЎзХДП депутатлик гуруҳи аъзолари кўмагида маҳалламиздаги 9 нафар пилла етиштирувчи аёлга қонуний тартибда меҳнат дафтарчаси очилди. Қишлоғимизда кўпчилик аёллар уй шароитида ҳунармандчилик билан шуғулланади. Уларга меҳнат дафтарчалари очилиши хотин-қизларнинг ижтимоий ҳимоясини таъминлайди. Шу йўналишдаги амалий ишларни кўпайтириш бошланғич ташкилотларнинг туман партия кенгаши ҳамда депутатлик гуруҳи билан ҳамкорлигини мустаҳкамлашга боғлиқлигини тажриба кўрсатмоқда.

Тадбирда, шунингдек, ЎзХДП Марказий Кенгаши бўлим мудири Зокиржон Холматов, Наманган вилоят партия кен­гаши раиси Дилором Абдураҳимова, ­туман хотин-қизлар қўмитаси раиси ­Василахон Тожибоева, Фуқаролик жамияти шаклланишини мониторинг қилиш мустақил институти Наманган ҳудудий бў­линмаси бош мутахассиси Нигорахон Нуралиева ва бош­қалар сўзга чиқиб, мавзу юзасидан фикр-мулоҳазаларини билдирди. Бошланғич ташкилотлар фаоллигини янада кучайтириш, электорат манфаати билан бевосита боғлиқ ташаббусларни кўпайтириш бўйича режалар белгилаб олинди.

Носиржон ДЕҲҚОНОВ,

«Ўзбекистон овози» мухбири.




DB query error.
Please try later.