05.11.2013

ИЖТИМОИЙ СОҲА ОБЪЕКТЛАРИ

куз-қиш мавсумига тайёр...ми?

Президентимизнинг 2013 йил 5 июлдаги «Республика иқтисодиёти тармоқларини 2013-2014 йиллар куз-қиш даврида барқарор ишлашга тайёрлашни таъминлаш чора-тадбирлари тўғрисида»ги қарори ижроси юзасидан пойтахтимиз Тошкентда қандай ишлар олиб борилмоқда?

Шаҳар ҳокимлигидан олинган маълумотларга кўра, тегишли тадбирлар режаси ишлаб чиқилиб, босқичма-бос­қич амалга оширилмоқда. Айни пайтда қозонхоналар, иссиқлик трассалари, муҳандислик-коммуникация тармоқларини таъмирлаш, зарур ёқилғи захирасини яратиш, электр ҳамда газ таъминоти қурилмаларини текшириш ишлари ниҳоясига етказилган.

Мавсумга тайёргарлик асосида 12 та мактаб ҳамда 21 та мактабгача таълим муассасасини капитал таъмирлаш, 7 та мактабни реконс­трукция қи­лиш, 276 та мактаб, 418 та мактабгача таълим муассасаси, 22 та Меҳрибонлик уйи ва мактаб-интернатларни жорий таъмирлаш ишлари ниҳоясига етказилган. Ушбу муассасалардаги 819 та иссиқлик бў­ғинлари профилактик таъмирланди.  Шунингдек, 27,7 минг квадрат метр том қисмлари таъмирдан чиқарилди. Шу билан бирга 18 минг квадрат метр ойналар қўйилиб, 34 та муассасада электр тармоқлари жорий таъмирдан чиқарилди. 34 та муассасадаги иссиқлик қозонхоналари мавсумга тайёр ҳолатга келтирилди.

Соғлиқни сақлаш тизими бўйича эса 3 та муассаса капитал ва 8 таси жорий таъмирланди. Ушбу муассасалардаги 242 та иссиқлик бўғинлари профилактик таъмирланди. 2 та иссиқлик қозонхонаси жорий ҳамда 5,5 минг квадрат метр томлар таъмирланди. Шу билан бирга 2 та соғлиқни сақлаш муассасасида иситиш тизими яхшиланди, ушбу объект­лар ҳудудидаги 320 метр таш­қи иссиқлик тармоқлари изоляцияси тикланди.

Ўрта махсус касб-ҳунар таълими муассасаларининг 16 таси капитал, 6 тасида иситиш тизими, 7 тасида сантехника, 17 тасида ичимлик суви ва 8 тасида иссиқлик сув тармоқлари жорий таъмирланди. 276 та муассасадаги иссиқлик бўғинлари профилактик кўрикдан ўтказилди. 5,1 минг квадрат метр томлар таъмирланиб, 1,4 минг квадрат метр ойна ўрнатилди.

Кўп қаватли уйларда истиқомат қилувчи фуқароларнинг яшаш шароитлари кўп жиҳатдан қишнинг совуқ кунларига нечоғли пухта тайёргарлик кўрилишига боғлиқ. Тошкент шаҳар хусусий уй-жой мулк­дорлари ширкатлари уюшмаси бош­қаруви раиси ­Алишер ­Набиев бу ҳақда қуйи­дагиларни гапириб берди:

— Бугун пойтахтимизнинг 11 та туманида жами 9155 та кўп қаватли уй бўлиб, уларга 2327 та хусусий уй-жой мулкдорлари ширкати ва 206 та Бошқарув сервис компаниялари хизмат кўрсатиб келмоқда. Жорий йилда кўп қаватли уйларда юзага келиши мумкин бўлган авария ҳолатларини тезкор бартараф қилиш, уй-жойлардан фойдаланиш хизматлари сифатини яхшилаш, ширкатларнинг шартнома асосида таъмирлаш хизматларини ўз вақтида кўрсатиш мақсадида барча туманларда намунавий «Авария-диспетчерлик хизмати» шаклидаги хизматлар ташкил қилинмоқда. Шунингдек, Тошкент шаҳар ­Хусусий уй-жой мулкдорлари ширкатлари уюшмаси қошида 3 та ихтисослаштирилган Бош­қарув сервис компаниялари тузилиб, улар учун ­Сергели туманида ишлаб чиқариш базаси ва 3 та «Damas» автомашинаси ажратилган.

Мавсумга тайёргарлик доирасида кўп қаватли уйларнинг 9804 та иссиқлик тизимлари профилактик таъмирдан чиқарилди. Кўп қаватли уйларнинг 1 миллион 302 минг квадрат метр том қисми жорий ва мукаммал таъмирдан чиқарилди. Бундан ташқари, 450 та кўп қаватли уйларнинг ертўла қисм­ларида муҳандислик тармоқлари мукаммал таъмирланди.

Алишер Набиевнинг айтишича, бу йилги қишга тайёргарлик режаси ўтган йилдаги камчилик ва муаммолардан келиб чиқиб тузилган.

Уй-жой, коммунал соҳадаги муаммоларни ўрганиш, уларга ечим топиш масаласи ЎзХДП дастурий мақсадларда ҳам алоҳида белгиланган. Шу боис Тошкент шаҳар кенгашидаги партия ташкилотлари, халқ депутатлари шаҳар Кенгашидаги депутатлик гуруҳи айнан шу бўйича қатор масалаларни шаҳар Кенгаши сессияларига олиб чиқаётир. Шунингдек, партия Жамоатчилик қабулхоналарига келиб тушаётган мурожаатларнинг аксарияти коммунал соҳага тўғри келади.

Партия ташкилотлари ва депутатлик гуруҳи томонидан уй-жой-коммунал соҳада учраётган айрим муаммоларни тегишли ташкилотлар ҳамкорлигида бартараф этишга ҳаракат қилиняпти. Хусусан, ўтган йил давомида Жамоатчилик қабулхоналарига 462 та мурожаат тушган бўлса, шундан 63 таси айнан коммунал соҳага тегишли масалалар бўлган. Уларнинг аксарияти депутатлар ваколати доирасида ҳамда тегишли идоралар ҳамкорлигида ижобий ҳал этилган. Жорий йилнинг ўтган 10 ойи давомида коммунал соҳа бўйича фуқаролардан 50 га яқин мурожаат тушган. Демак, ўтган йилга нисбатан бу йил коммунал соҳага тегишли мурожаатлар камайган.

— Маҳалламиз ҳудудида 10 та кўп қаватли уй мавжуд бўлиб, 1970 нафар аҳоли истиқомат қилади, — дейди Чилонзор туман, Бешёғоч маҳалласи фаоли, ЎзХДП аъзоси ­Вилоят Худойбер­диева. — Айни пайтгача маҳалламиздаги барча кўп қаватли уйларнинг иссиқ сув ва совуқ сув тармоқлари профилактик кўрикдан ўтказилди. Ўтган йилги қиш мавсумида бироз таъмирталаб бўлган 3 та кўп қаватли уйнинг томи тўлиқ таъмирдан чиқарилди.

— Ўтган йилги қиш мавсумида ёғингарчиликлар кўп бўлди­ми, уйимиз тепасидан бироз чакки ўтганди, — дейди Олмазор туман Себзор даҳаси 16-уй, 43-хонадонда истиқомат қилувчи Сурайё Алимардонова. — Кўп қаватли уйнинг 4-қаватида яшаймиз, уйнинг томи таъмирланмаса, биринчи бўлиб биз азият чекамиз. Яқинда уй тўлиқ таъмирдан чиқарилди. Иссиқ ва совуқ сув, иссиқлик тармоқлари ҳам кўрикдан ўтказилди.

Юқоридаги маълумотлардан кўриниб турибдики, пойтахтимиз аҳолиси аёзли кунларни ташвишсиз ўтказиши таъминланади.

Тоштемир ХУДОЙҚУЛОВ,

«Ўзбекистон овози» мухбири.



DB query error.
Please try later.