31.10.2013

МУСТАҲКАМ ОИЛА – МУСТАҲКАМ ЖАМИЯТ ТАЯНЧИ

«Оила жамиятнинг асосий бўғинидир ҳамда жамият ва давлат муҳофазасида бўлиш ҳуқуқига эга. Ота-оналар ўз фарзандларини вояга етгунларига қадар боқиш ва тарбиялашга мажбурдирлар. Вояга етган, меҳнатга лаёқатли фарзандлар ўз ота-оналари ҳақида ғамхўрлик қилишга мажбурдирлар»

Ўзбекистон Республикаси Конституциясининг XIV боби

Оила жамиятимиз таянчи, никоҳ эса унинг пойдевори саналади. Фарзанднинг келажакда нечоғли комил инсон бўлиб вояга етиши, ҳеч шубҳасиз, оилада берилган тарбия­га боғлиқ. Шу боис халқимизда оила қадимдан муқаддас даргоҳ сифатида қаралади ва эъзозланади. Фарзанд тарбиясига масъуллик, ота-онага ғамхўрлик халқимизнинг қон-қонига сингиб кетган миллий қадриятлардан ҳисобланади.

Дарвоқе, Бош қомусимизда «Оила» деб номланган алоҳида боб мавжуд. Унда оиланинг муҳим ижтимоий институт сифатида давлат муҳофазасига олинганининг ўзиёқ оила ва унинг мустаҳкамлиги жамиятимиз учун нечоғли аҳамиятли эканлиги исботи саналади. Асосий қонунда белгиланган оилага муносабат «Оила кодекси», «Фуқаролик кодекси», Президентимизнинг «Она ва бола саломатлигини муҳофаза қилиш, соғлом авлодни шакллантиришга доир қўшимча чора-тадбирлар тўғрисида»ги ва «2009-2013 йилларда аҳолининг репродуктив саломатлигини мустаҳкамлаш, соғ­лом бола туғилиши, жисмоний ва маънавий баркамол авлодни вояга етказиш борасидаги ишларни янада кучайтириш ва самарадорлигини ошириш чора-тадбирлари Дастури тўғрисида»ги қарорлари ҳамда Вазирлар Маҳкамасининг 2003 йил 25 августдаги «Никоҳланувчи шахсларни тиббий кўрикдан ўтказиш тўғрисида»ги қарорида тўла-тўкис ўз аксини топди, десак хато қилмаймиз. Ушбу ҳужжатларнинг ижроси баркамол авлодни тарбиялаш, оналик ва болаликни ҳимоя қилиш, аҳолининг репродуктив саломатлигини муҳофазалаш, бир сўз билан айтганда, оилани мустаҳкамлашга хизмат қилмоқда.

Жорий йилнинг ўтган тўққиз ойи мобайнида туманимизда 1026 та никоҳ қайд этилди. Никоҳланувчи шахсларга, аввало, оиланинг муқаддаслиги, эр ва хотин мажбурияти тушунтирилди. 1852 нафар никоҳланувчи тиббий кўрикдан ўтказилди. 2434 нафар чақалоқ дунёга келди.

Конституциямизнинг мазмуни, оиланинг нақадар муқаддас гўша эканлиги, бу борада қабул қилинган қонун, қарор ва бош­қа меъёрий ҳужжатлар моҳиятини халқимизга тушунтириб бориш биз, ҳуқуқшуносларнинг зиммамизга катта масъулият юклайди. Шу боис туман хотин-қизлар қўмитаси, туман прокуратураси, ички ишлар бўлими ва бошқа ҳуқуқни муҳофаза қилиш идоралари, қишлоқ, маҳалла фуқаролар йиғинлари, ЎзХДП маҳаллий Кенгаши депутатлари билан ҳамкорликда кенг кўламдаги тар­ғибот тадбирларини ташкил этиб бораяпмиз. Зеро, оила мустаҳкамлиги жамият тараққиётига хизмат қилишини ҳар бир юртдошимиз, айниқса, ёшлар чуқур анг­лаб етиши зарур. Чунки оила мустаҳкам бўлса, жамият ҳам мустаҳкам ва барқарор бўлади.

Наргиза САЛИЕВА,

Поп тумани 1-сон ФҲДЁ бўлими мудири.



DB query error.
Please try later.