29.10.2013

ЮКСАК ЭЪТИБОР ВА ФИДОКОРОНА МЕҲНАТ НАТИЖАСИ

Мамлакатимиз Президенти Ислом Каримовнинг Ўзбекистон пахтакорлари ва барча меҳнаткашларига йўллаган табриги ўз касбининг устаси ва фидойиси бўлган деҳқонларимизни, фермерларимизни, бу юксак хирмонга ҳисса қўшган ҳар бир юртдошимизни қувонтириб, уларни янги ютуқларга руҳлантирмоқда.

Инсон қилган меҳнати эвазига яхши гап эшитса, меҳнати қадрланаётганини кўрса, кўнгли кўтарилади, боши осмонга етади, чарчоқларини унутади, янада ғайрат билан ишлагиси келади. Юртбошимиз табригини ўқиб, ниҳоятда хурсанд бўлдим. Айниқса, мамлакатимизда биринчилардан бўлиб, белгиланган режани бажарган туманлар қаторида бизнинг ­Элликқалъа тумани номи келтирилганидан, туманимиз ютуғида фермер хўжалигимиз ҳиссаси борлигидан фахрландим.

Хўжалигимиз 2002 йили чўл зонасида такшил этилган. Бизнинг шароитда деҳ­қончиликда юқори ҳосил олиш имкони бошқа ҳудудларга нисбатан камлигига қарамай, белни маҳкам боғлаб, астойдил меҳнат қилдик. Шунга яраша ҳосил кўтардик.

Биз чўл ҳудудида пахта етиштираётганимиз, далаларимизга насос орқали сув чиқарилишига қарамай, биринчи теримдаёқ 25 цент­нердан ошириб ҳосил олдик. Даламизда ҳали пахта бор, 30 центнерлик маррани кўзлаб турибмиз.

Аввало, шуни айтмоқчиманки, бугунги мўл ҳосил мамлакатимизда фермер хўжаликларини ривожлантиришга юксак эътибор қаратилаётгани, фермерлар қўллаб-қувватланаётгани ва, албатта, деҳқонларимизнинг фидокорона меҳнати туфайли етиштирилди.

Президентимиз 90-йилларда юртимизда етиштирилган жами пахта толасининг атиги 7 фоизи ўзимизда қайта ишлангани, бу рақам ўтган давр мобайнида 6 баробар ортиб, ҳозирда 40 фоизни ташкил этаётганини таъкидлади. Бу рақам остида қандай маъно-мазмун ётганини ҳаммамиз яхши тушунамиз, албатта. Демак, меҳнатимизнинг роҳатини ўзимиз кўраяпмиз, одамларнинг иш билан банд­лиги таъминланаяпти, даромад кўпаймоқда. Буни бизнинг хўжалигимиз мисолида ҳам кўриш мумкин. Олган даромадимиз ҳисобига сунъий кўл ташкил этиб, балиқчиликни йўлга қўйдик, савдо дўкони очдик. Келажакда чорвачиликни ҳам ривожлантирмоқчимиз. Хўжалигимиз аъзоларининг даромадлари ҳам ошиб бормоқда.

Бугунги хурсандчилик кунларида менинг ҳам кўнглимдан бир гап ўтаяпти.

Президентимиз томонидан биз пахтакорларга кўрсатилаётган улкан ғамхўрликка жавобан келгуси йили ҳосилдорликни 35 центнердан оширишни ният қилдик. Бунинг учун имкониятимиз ҳам, кучимиз ҳам етарли.

Тожибой МАТЁҚУБОВ,

Қорақалпоғистон Республикаси Элликқалъа туманидаги «Машраб ота Чўлқувар» фермер хўжалиги раҳбари, халқ депутатлари туман Кенгашидаги ЎзХДП депутатлик гуруҳи аъзоси.



DB query error.
Please try later.