08.10.2013

ЎЗБЕКИСТОН, БРАЗИЛИЯ, АҚШ

Умумжамоа ҳисобида ўринлар шундай тақсимланди

Пойтахтимиздаги «Ўзбекистон» спорт саройида дзюдо бўйича Гран-при туркумидаги халқаро турнирда ҳамюртларимиз 5 та олтин, 3 кумуш ва  5 та бронза медалини қўлга киритишди.

Уч кун давом этган мазкур ну­фузли мусобақада дунёнинг йигирма бир мамлакатидан келган 154 нафар спортчи ғо­либлик учун татамига чиқди. Унда эркаклар ва аёллар еттитадан вазн тоифасида жами ўн беш комплект медаллар учун беллашдилар.

— Гран-при туркумига кирувчи ушбу мусобақа ҳар йили жаҳоннинг ўнта давлатида ўтказилади, — дейди Халқаро дзюдо федерацияси (IJF) етакчи мутахассиси Носир Ал-Тамимий. — Нуфузи жиҳатидан жаҳон чемпионатидан кейинги ўринда турувчи мазкур мусобақани ўтказишга даъвогар мамлакатлар талайгина эди. Аммо улар орасидан Ўзбекистонни танлаганимиз бежиз эмас. Бу ердаги тинч­лик ва осойишталик, йирик халқ­аро турнирларни ўтказиш борасида орттирилган бой тажриба, яратилган қулай шарт-шароитлар бунга асос бўлганлигини алоҳида таъкидлашни истардим. Қолаверса, ўзбекистонлик дзюдочиларнинг Осиё ва жаҳон чемпионатлари, Олимпия ўйинларида эришаётган ютуқлари барчанинг ҳавасини келтирмоқда.

Дарҳақиқат, Тошкентда ўтказилган Гран-при халқаро турнирида 2016 йил Рио-де-Жанейро (Бразилия)да бўладиган XXXI ёзги Олимпия ўйинларининг йўлланмалари учун рейтинг очколар ҳам ўйналди. Ҳар бир вазн тоифасида биринчи ўринни эгаллаган спортчига 300, кумуш медаль совриндорига 180, бронза медали соҳибларига эса 120 тадан рейтинг очколари берилди. 

Мусобақанинг мамлакатимизда ташкил этилиши эса Ватанимиз спортчиларининг тўртта таркибда қатнашишларини таъминлаб берди. Жумладан, беллашувларда Ўзбе­кис­тон терма жамоаси шарафини жами қирқ тўққиз нафар дзюдочи ҳимоя қилди.

Беллашувлар якунида умумжамоа ҳисобида спортчиларимиз бешта олтин, учта кумуш ҳамда бешта бронза медалига сазовор бўлиб, биринчи ўринни эгалладилар.

Халқаро турнирда ўз вазн тоифаларида полвонларимиздан Шарофиддин Лутфуллаев (60 кг), Мирзоҳид Фармонов (66 кг), Мирали Шарипов (73 кг), Шерали Жўраев (90 кг), Сойиб Қурбонов (100 кг)лар олтин, Эркин Дониёров (90 кг), Рамзиддин Саидов (100 кг), Болтабой Болтаев (+100 кг)лар кумуш, Нодира Гулова (48 кг), Гулноза Матниёзова (70 кг), Сенайим Эркинбоева (+78 кг), Яҳё Имомов (81 кг), Дилшод Чориев (90 кг)лар бронза медалини қўлга киритиб, Ўзбекис­тон терма жамоаси муваффақиятига муносиб ҳисса қўшдилар.

Кейинги фахрли иккинчи ва учинчи поғоналардан Бразилия (3 олтин, 2 кумуш, 3 бронза) ва АҚШ дзюдочилари (1 олтин, 3 кумуш) жой олди.

Эркин ХОЛБОБО,

«Ўзбекистон овози» мухбири.



DB query error.
Please try later.