19.09.2013

ЖАҲОН ШОҲМОТИНИНГ ЎН ИККИ МАЛИКАСИ

Тошкентда FIDE Гран-присининг учинчи босқич баҳсларида ўз маҳоратларини намойиш этишмоқда

Ўзбекистон Тасвирий санъат галереясида ўтказилаётган ушбу нуфузли мусобақа Халқ­аро шоҳмот федерация­си, Ўзбекистон Маданият ва спорт ишлари вазирлиги, Республика шоҳмот федерацияси ҳамда «Ўзбекистон маданияти ва санъати форуми» жамғармаси ҳамкорлигида ташкил этилмоқда.

Олти босқичдан иборат мазкур Гран-при турнирида жаҳоннинг энг сара шоҳмот усталари қатнашиши кўзда тутилган. Ҳар бир босқичда ўн икки нафардан иштирокчи дона суради. Уларнинг ҳар бири Гран-при туркумидаги тўрт­тадан турнирда ўз омадини синаб кўради. Якунда энг кўп балл жамғарган шоҳмотчи 2015 йилда амалдаги жаҳон чемпиони билан шоҳмот тожи учун ўн партиядан иборат учрашувда баҳс юритиши белгиланган.

Тақвимга кўра, амалдаги йилда ўтадиган баҳслар уч бос­қичда ташкил этилади. Ҳозиргача ўтган дастлабки икки босқич учрашувларига Женева (Швейцария) ҳамда Дилижон (Арманистон) шаҳарлари мезбонлик қилганди. Навбатдаги баҳслар пойтахтимизда уюштирилаётган бўлса, келгуси йили мусобақалар Ханти-Мансийск (Россия), Тбилиси (Грузия) ва Эрденет (Мўғулистон) шаҳарларида ўтказилади.

FIDE Гран-присининг учинчи босқичида юртимиз шарафини Осиё чемпионати ва Осиё ўйинлари кумуш медали совриндори, халқаро гроссмейстер Нафиса Мўминова (FIDE таснифидаги кўрсаткичи — 2293 очко) ҳимоя қилмоқда. Шунингдек, мусобақада грузиялик Бела Хотенашвили (2514), ҳиндис­тонлик Хампи Конеру (2607), Харика Дроновалли (2475), хитойлик Цзю Венцзюн (2535), Чжао Сюэ (2579), украиналик Катерина Ланго (2532), болгариялик Антуанетта Стефанова (2496), россиялик Алек­санд­ра Костенюк (2495), Ольга Гирья (2439), арманистонлик Элина Даниэлян (2470) ҳамда қозоғистонлик Гулисхан Нахбаева (2307)лар ғолиблик учун курашяпти.

Кирсан ИЛЮМЖИНОВ, FIDE президенти:

— Ўзбек заминига яна бир бор ташриф буюрганимдан мамнунман. Кейинги йилларда Ўзбекистон шоҳмот бўйича йирик му­собақаларга мезбонлик қилаётганлигини алоҳида таъкидлашни истардим. Ўтган йили эркаклар ўртасида FIDE Гран-приси баҳслари ўтказилганди. Аёллар ўртасидаги мусобақаларга ҳам катта ҳозирлик кўрилганлигининг шоҳиди бўлиб турибмиз. Ишонаманки, юртингиз бундан-да нуфузли мусобақаларга мезбонлик қилиш салоҳиятига эга. Бугун дунёнинг етакчи шоҳмот усталари Ўзбекистонда бўладиган турнирларга ташриф буюраётганлиги ҳам фикрим тасдиғидир.

Нафиса МЎМИНОВА, ­халқаро гроссмейстер:

— Нуфузи жиҳатидан ушбу турнир жаҳон чемпионатидан қолишмайди. Мусобақадаги рақибаларимнинг ҳар бири катта тажриба ва юксак маҳоратга эга. Турнирнинг Тошкентда ўтказилиши менга катта масъулият юклайди. Иштирокчиларнинг ўйин услубини жиддий ва пухта ўрганишга ҳаракат қилдим. Мусобақа олдидан мамлакатимиз ва Малайзияда ўтказилган бир қатор турнирларда қатнашдим.

Гран-при босқичида илк маротаба иштирок этяпман. Ундаги қатнашчилардан тўрт нафари билан илгари турли мусобақаларда ўйнаганман. Жаҳон ва Европа чемпиони Антуанетта Стефанова билан ўтган уч партияда уч хил натижа — ғалаба, дуранг ва мағлубият қайд этилган. Йигирма ёшгача қизлар ўртасида ўтказилган жаҳон чемпионати ғолиби Харика Дроновалли, 18 ёшгача қизлар ўртасида жаҳон ва Европа чемпиони Ольга Гирьяларга қарши ўтган учрашувларда дуранг ўйнаганман. Хитойлик Чжао Сюэ ҳам катта маҳоратга эга. Унга қарши кечган партияда имкониятни бой берганман.

Кайфиятим аъло даражада. Бу гал фақат ғалаба учун курашаман.

Бела ХОТЕНАШВИЛИ, Жаҳон ва Европа чемпионати совриндори (Грузия):

— FIDE Гран-присининг Женева ҳамда Дилижонда ўтган дастлабки икки босқичида қатнашишга муваффақ бўлдим. Дастлабки босқичда 8 очко жамғариб, ғолибликни қўлга киритган бўлсам, Дилижонда кечган баҳсларда сўнгги поғонани банд этгандим.

Умумий соврин жамғармаси 60000 еврони ташкил қилувчи мазкур турнирда иштирокчилар бир даврали тизимда жами 11 партияда ўз омадларини синаб кўрадилар. Энг кўп очко жамғарган уч нафар шоҳмотчи  ғолиб ва сов­риндор сифатида ташкилотчилар томонидан тақдирланади.

Эркин ХОЛБОБО,

«Ўзбекистон овози» мухбири.

 

Кеча ўтказилган дастлабки турда қуйидаги жуфтликлар ўзаро дона сурди:

Элина Даниэлян — Александра Костенюк — 0,5:0,5

Хампи Конеру — Цзю Венцзюн — 1:0

Катерина Лагно — Ольга Гирья — 0,5:0,5

Антуанетта Стефанова — Гулисхан Нахбаева — 1:0

Харика Дроновалли —  Бела Хотенашвили  — 1:0

Нафиса Мўминова — Чжао Сюэ — 0:1



DB query error.
Please try later.