07.09.2013

АҲОЛИ ВАКИЛЛАРИ БИЛАН ОЧИҚ МУЛОҚОТ

кўтарилаётган масалаларга ечим топишда янада масъулиятли бўлишни тақозо этади

Бугун одамларни нима ўйлантираяпти? Ҳудудларда қандай ижтимоий-иқтисодий масалалар ечимини кутмоқда? Уларни ҳал қилиш учун нималарга эътибор қаратиш зарур?

ЎзХДП Навоий вилоят ва Навоий шаҳар кенгаши ташаббуси билан шаҳарнинг «Турон», «Мустақиллик», «Меъморлар» ва «Гулзор» маҳаллаларида ўтказилган учрашувлар ана шу саволларга жавоб олиш, бу борада аҳоли вакиллари фикрини ўрганиш мақсадида ташкил этилди.

Учрашувларда юртимизда инсон манфаатини таъминлаш ҳар нарсадан устун экани таъкидланар экан, истиқлол йилларида аҳолини ижтимоий қўллаб-қувватлаш борасида амалга оширилаётган ишлар аниқ мисоллар асосида таҳлил этилди. Шунингдек, халқ депутатлари Навоий шаҳар Кенгаши депутати, ЎзХДП депутатлик гуруҳи аъзоси Фахриддин Нуруллаев билан очиқ-ошкора суҳбат бўлиб ўтди. Фуқаролар депутатга ўзларини қизиқтираётган саволлар билан мурожаат этди, айни пайтда, унинг олти ойлик фаолияти ҳақидаги ҳисоботини тинглашди. Эришилган муваффақиятлар эътироф этилиб, ечимталаб масалалар биргаликда муҳокама қилинди. Олий таълим муассасаларига шартнома асосида ўқишга кирган талабаларга тижорат банклари томонидан берилаётган таълим кредити ва уни олиш йўллари хусусида учрашувда қатнашган банк мутасаддилари атрофлича тушунча беришди.

Шу ўринда таъкидлаш лозимки, вилоятдаги ЎзХДП Жамоатчилик қабулхоналарига жорий йилнинг ўтган 6 ойи мобайнида 160 га яқин мурожаат тушган. Ҳозиргача уларнинг қарийб 72 фоизи тегишли идора ва ташкилотлар ёрдамида ижобий ечим топган. Мурожаатларнинг асосий қисмини коммунал хизматларга ҳақ тўлашдаги тушунмовчиликлар, тижорат банкларидан кредит олиш, қишлоқ жойларида ишга жойлашиш билан боғлиқ айрим муаммолар ташкил этди.

— Мен ўзимга тўғри келадиган иш ахтариб юргандим, — дейди Нурота туманида истиқомат қилувчи фуқаро Шоҳида Жўрақулова. — Шунда бир танишим ЎзХДП Жамоатчилик қабулхонасига мурожаат қилишни маслаҳат берди. ЎзХДПнинг туман марказидаги идорасига бордим. Мурожаатим беэътибор қолмади. Уларнинг кўмаги билан «Нурота текстил» корхонасига ишга жойлашдим.  Мурожаатим ўз вақтида ўрганилиб, амалий ёрдам берилгани партияга ишончимни янада оширди.

— Жамоатчилик қабулхоналарида кўтарилаётган масалалар партия фаоллари, депутатлик гуруҳларимиз ва ҳамкор ташкилотлар томонидан ўрганилиб, муаммолар бартараф этилаяпти, — дейди ЎзХДП Навоий вилоят кенгаши бўлим мудири ­Феруза Қодирова. — Аммо биз «Қабулхоналаримизга қачон одамлар келса, уларга имкон қадар ёрдам кўрсатамиз» деб кутиб ўтирмасдан маҳаллаларда, турли корхона ва ташкилотларда давра суҳбатлари ташкил этиб, фуқароларимизнинг мурожаатларини қабул қилаяпмиз, улар билан очиқ мулоқотлар ташкил этаяпмиз. Электорат вакилларининг фикрларини умумлаштириб, депутатлик гуруҳларимиз доимий комиссияларда муҳокама этиб, сессиялар кун тартибига олиб киришига ҳаракат қилмоқда.

Илҳом САТТОРОВ,

«Ўзбекистон овози» мухбири. 



DB query error.
Please try later.