05.09.2013

СУДЛАРНИНГ МОДДИЙ-ТЕХНИКА БАЗАСИ МУСТАҲКАМЛАНМОҚДА

Мамлакатимизда мустақиллик йилларида барча соҳалар қаторида суд-ҳуқуқ тизимида ҳам изчил ислоҳотлар амалга оширилмоқда. Судларнинг чинакам мустақиллиги ва суд идораларининг самарали фаолият юритишини таъминлашга доир бир қатор ташкилий чора-тадбирлар ишлаб чиқилиб, ҳаётга жорий қилинди.

Жумладан, Адлия вазирлиги ҳузуридаги Суд қарорларини ижро этиш, судлар фаолиятини моддий-техника жиҳатидан ва молиявий таъминлаш департаменти ташкил этилди. Суд департаменти органларига суд ҳужжатлари ва бошқа органлар ҳужжатларининг сўзсиз ижро этилишидан таш­қари, судлар фаолиятини моддий-техника жиҳатидан ва молиявий таъминлаш, судлар биноларини қуриш ва таъмирлаш учун ажратилган капитал маблағларни самарали ўзлаштириш ҳамда судлар фаолияти учун зарур шарт-шароитлар яратиш вазифалари юклатилди.

Суд департаменти томонидан Судлар ва адлия органларини ривожлантириш жамғармасидан 2001-2012 йиллар давомида умумий юрисдикция судларининг моддий-техника базасини мустаҳкамлаш мақсадида, судларни автотранспорт, компьютер, мебель, оргтехника ва бошқа жиҳозлар билан таъминлашга 13 млрд. 723 млн. сўм, янги биноларнинг қурилиши ва мавжудларини капитал ҳамда жорий таъмирлаш учун 48 млрд. 816,4 млн. сўм сарфланди. Шунингдек, Суд департаменти тизимини автотранспорт, компьютер, мебель, оргтехника ва бошқа жиҳозлар билан таъминлаш мақсадида 8 млрд. 057,8 млн. сўм, янги биноларнинг қурилиши ва мавжудларини капитал ҳамда жорий таъмирлаш учун 17 млрд. 686,4 млн. сўмдан ортиқ маблағ ишлатилди.

Шундан умумюрисдикция судларининг 228 та маъмурий бинолари капитал ва жорий таъмирдан чиқарилиб, 20 та янги маъмурий бино ва 15 дан ортиқ милиция назорат пости қуриб фойдаланишга топширилди. Суд департаменти тизимининг 89 та маъмурий бинолари эса капитал ва жорий таъмирдан чиқарилди, 18 та маъмурий бино қурилди. 8 та маъмурий бино ва 6 та хизмат уйи сотиб олинди.

Президентимизнинг 2012 йил 2 августдаги Фармонига асосан, жиноят ва фуқаролик ишлари бўйича вилоят ва туман (шаҳар) судлари судьяларининг ойлик иш ҳақи ягона тариф разрядлари 2 разрядга оширилди ҳамда судьяларга махсус шароити бўйича 50 фоизлик устамалар жорий қилинди.

Шунингдек, Вазирлар Маҳкамасининг 2012 йил 31 октябрдаги қарори билан судьяларга уй-жойни ижарага олганлик (ижарада турганлик) учун ҳар ойлик пул компенсацияси тўлаш тартиби тўғрисидаги ва судьяларга имтиёзли шартларда уй-жой сотиб олишга узоқ муддатли ипотека кредитлари бериш тартиби тўғрисидаги Низомлар тасдиқланди. Уй-жойларни ижарага олганлик ҳақида шартноманинг нотариал идораларда тасдиқланган нусхаси ҳудудий бошқармаларга тақдим қилинганда, судьяларга ҳар ойда пул компенсацияси тўлаш ва имтиёзли шарт­ларда уй-жой сотиб олишга узоқ муддатли ипотека кредитлари бериш жорий қилинди.

Бундан ташқари, 2013 йил 1 январдан бошлаб биринчи тоифадаги туман (шаҳар) бўлимлари суд ижрочиларининг меҳнатига ҳақ тўлаш тариф разряди 2 тариф разрядига, иккинчи тоифадаги бўлимларда 1 тариф разрядига оширилди. Шу билан бирга, давлатга ундирув миқдори кўп бўлган суд ижрочиларига ҳар ойда устама тўлаш белгилаб қўйилди.

Буларнинг барчаси суд мустақиллигини янада мустаҳкамлашга, судья­ларни моддий жиҳатдан рағбатлантиришга хизмат қилади.

Баҳодир ЮСУПОВ,

Адлия вазирлиги ҳузуридаги Суд қарорларини ижро этиш, судлар фаолиятини  моддий-техника жиҳатидан ва молиявий таъминлаш департаменти директори ўринбосари.



DB query error.
Please try later.