01.09.2013

НАВОЛАРДА ТИНЧЛИК, ДЎСТЛИК, ЭЗГУЛИК ТАРАННУМ ЭТИЛДИ

«Шарқ тароналари» халқаро мусиқа фестивали дунё­нинг турли минтақаларидан ташриф буюрган иштирокчилар учун ўз миллий санъатини намойиш этиш билан бирга, турли халқларнинг маданиятини ўрганишга имконият яратди.

Самарқандда 30 август куни «Шарқ тароналари» IX халқаро мусиқа фестивалининг тантанали ёпилиш маросими ўтказилди. Ғолиб ва совриндорларнинг номлари эълон қилинди.

Фестивалнинг тантанали ёпилиш маросимида Ўзбекистон Республикаси Бош вазирининг ўринбосари А.Икромов, Самарқанд вилоят ҳокими З.Мирзаев иштирок этди.

Махсус мукофот сов­риндор­лари: Санам Марви (Покистон), Галит Гиат (Исроил), Таул Триини (Эстония), Нади Сингарура (Сингапур), Саломат Аяпов (Ўз­бекис­тон), Кеннету Данкан (АҚШ).

3-ўрин: Аброр Зуфаров (Ўзбекистон), «Чикуюша» гу­руҳ жамоа­си ва австриялик трио.

2-ўрин: «Пентан» гуруҳи (Буюк Британия), «Сорихвеон гаягеум беёнчанг» гуруҳи (Корея Республикаси), Хитой миллий опера ва драма театри жамоаси.

1-ўрин: «Садои Помир» гу­руҳи (Афғонистон) ва «Ла­ная» гуруҳи (Буркино Фасо).

Гран-при совриндори — Рашми АГАРВАЛ Ҳиндис­тон фольклор жамоасининг хонандаси.

Ли Хёнг ХВАН, Ҳайъат аъзоси (Корея Рес­публикаси):

— «Шарқ тароналари» жозибаси мени мафтун этди. Очилиш маросимидаги таассуротларимни фестиваль кундалигидаги чиқишлар янада бойитди. Уларнинг ҳар бири бетакрор, қай бирига қандай баҳо қўйишга ҳам ақлинг шошади. Тадбирнинг алоҳида ажралиб турадиган жиҳати, уни Регистон майдонида ўтаётганлигидир. Бунда рамзий маъно бор. Чунки мазкур фестиваль маданият ва анъаналар тарғиботига хизмат қилади.

Хатири Абдуллоҳ МАҲМУД, (Саудия Арабистони):

— Бу ерга келмасдан олдин Ўзбекистон, Самарқанд ҳақида интернет орқалигина билардик, фестивалга келгач, менинг тасаввурим бутунлай ўзгарди. Буюк тарихга эга Самарқанднинг Регистон майдонида бетакрор истеъдод соҳибларини кўрдим. Мусиқа йўналишида мени ўйлантирган кўпгина саволларга жавоб топдим. Бундай фестивалнинг ташкил этилганлиги ҳамда бизга кўрсатилган юксак эҳтиром ва меҳмондўстлик учун катта раҳмат.

Монти ЛОРЕМА, (Италия):

— Фестиваль биз учун жуда катта аҳамиятга эга. Унда биз нафақат иштирок этдик, балки ўзимиз учун жуда кўп янгиликлар очдик. Фестиваль шукуҳи, шаҳар кў­чалари, одамларнинг хушкай­фияти юртингиз обод ва кўр­кам эканлигини кўрсатиб турибди. Буни мамнуният билан эътироф этмоқчиман.

— Ўзбекистонда миллий урф-одатларни сақлаб қолган ҳолда бошқа халқларнинг қадриятларига ҳам юксак ҳурмат билан қаралиши мени ҳайратга солди. Фес­тиваль давомида бошқа мамлакатларнинг санъати ва маданиятини кўр­дик, ўргандик, жуда қи­зиқ бўлди. Ўз ўрнида биз ҳам ижод намуналаримизни на­мо­йиш қилдик.

Муҳаммад Мурод САРХУШ, «Садои Помир» гуруҳи раҳ­бари (Афғонис­тон):

— Сўз билан ифода қилиб бўлмайдиган қувончли ҳо­лат. Биз бу бетакрор фестивалда иштирок этиш учун биринчи бор Самарқандга ташриф буюрдик. У санъатимизни намойиш этиш учун ажойиб имконият бўл­ди. Бундай кенг ва муҳташам саҳнада куйлаш бахтига мушарраф бўлганлигимдан беҳад хурсандман.

Соломон ГОГАШВИЛИ, «Астроджоржия» гуруҳи раҳбари (Грузия):

— Биз Ўзбекистон ва унинг тари­хини жуда яхши би­ламиз. Дунёнинг энг қадимги шаҳар­лари бўлган Рим, Бобил тенгдоши бўлган ­Самарқанд қадимдан ма­­да­ният маркази бўлиб келгани ҳам бизга маълум. У азал­дан турли халқ вакиллари ва маданиятлари учрашган манзил бўл­ган. Бу ер­даги та­рихий обидалар биз учун ҳайратланарли.

2011 йилда Самарқандга меҳмон бўлиб келганимда фестиваль ҳақида эшитгандим. Бу йилги фестивалда жамоамиз билан Грузиянинг энг машҳур сара композициясини ижро этдик. Кўпчилик биздан рақс сў­рашади. Лекин куй-қўшиқларимизнинг ҳам ўз сеҳ­ри борлигини кўрсатгимиз келди.

Муҳаммад АЛБАНДА, созанда (Саудия Арабистони):

— «Шарқ тароналари» мусиқа фестивалида тарихий обидалар атрофида куйлаш менга завқ бағишлади. Гўё ўзимни минг бир кеча эртакларидаги султонлар ка­би ҳис этдим. Самарқандда биринчи марта бўлишим­га қарамай, унинг жуда бой тарихи, маданияти ва санъа­тини кўрдим, ўргандим. Биз ушбу фестивалда иштирок этаётганимиздан ниҳоятда мамнунмиз. Ушбу танлов халқларни бир-бири билан дўстлик, иноқликка чорлайди. Кейинги фестивалларда ҳам иштирок этиш ҳаммамизга насиб этсин.

Альбина ЖУМАНОВА,

Насиба СОБИРОВА,

«Ўзбекистон овози» мухбирлари.



DB query error.
Please try later.