20.08.2013

САНЪАТ БЎСТОНИДА ЯНГИ НИҲОЛЛАР

Президентимиз Ислом Каримов раҳнамолигида мамлакатимизда миллий мусиқа санъатини равнақ топтириш, ёш ижрочиларни ҳар томонлама қўл­лаб-­қув­ват­лаш масаласига алоҳида эътибор қаратилмоқда.

«Истиқлол» саройида 17 август куни Ўзбекистон Республикаси Президентининг ёш истеъдодлар учун «Ниҳол» мукофотини топширишга бағишланган тантанали тадбир ва гала-концерт бўлиб ўтди.

Тадбирга тегишли вазирлик ва идоралар, ижодий ва жамоат ташкилотларининг вакиллари, санъат ихлосмандлари таклиф этилди.

Ўзбекистон Республикаси Бош вазирининг ўринбосари А.Икромов мамлакатимизда Президентимиз раҳнамолигида ёшларни юксак маънавий-ахлоқий фазилатлар соҳиблари этиб камолга етказиш, эстетик диди ва тафаккури, дунёқарашини тўғри шакллантиришнинг асосий шарти сифатида мусиқа санъатини равнақ топтириш, унинг ўзига хос мактаб ва йўналишларини янада ривожлантириш учун кенг имкониятлар яратилганини таъкидлади.

Юртбошимизнинг «Юксак маънавият — енгилмас куч» асарида таъкидланганидек, ёшларни «оммавий маданият» руҳидаги оқимлар, менталитетимизга ёт, мазмунан саёз қў­шиқлардан ҳимоялашда санъаткорлар орасида соғлом ижодий муҳитни ташкил қилиш, ёш авлоднинг маънавий олами ва маданий савиясини юксалтириш, миллий ва жаҳон мусиқа маданиятининг мумтоз намуналари билан бирга, уларнинг кайфияти ва интилишларига мос келадиган замонавий эс­трада санъати намуналаридан кенг баҳраманд бўлиши учун зарур шароитлар яратиш, мусиқий таълимни ривожлантириш масалалари муҳим аҳа­мият касб этади.

Айни пайтда мамлакатимизда анъанавий тарзда ўтказилаётган ижодий танловлар, санъат байрамлари, концертлар, жонли ижродаги қўшиқлар фестивали ёшларнинг мусиқий дидини тўғри тарбиялаш, эстетик савиясини янада ошириш, халқимизни янги мусиқий асарлардан баҳраманд этишга хизмат қилмоқда.

Давлатимиз раҳбари ташаббуси билан 2000 йилда таъсис этилган «Ниҳол» мукофоти эстрада, мусиқа, мумтоз қўшиқ, рақс ва опера санъати ижрочилиги соҳасидаги маҳорати билан юртдошларимиз юрагига етиб борадиган, ёшларни эзгуликка чорлайдиган асарлар яратишда фаоллик кўрсатаётган 17 ёшдан 25 ёшгача бўлган иқтидорли йигит-қизларни рағбатлантириш мақсадида берилаётир.

Айни пайтда «Ниҳол» мукофо­ти янгидан-янги истеъдодларни кашф этиш, уларнинг ижоди­ни катта саҳналарда намойиш этиш учун яқиндан кўмаклашиш, ёшларни ҳар жиҳатдан қўллаб-қувватлашда алоҳида аҳамият касб этмоқда.

«Ниҳол» мукофотига саралаш 2006 йилдан буён уч босқичли тизимда ўтказилмоқда. Бундан кўзланган асосий мақсад мамлакатимизнинг чекка ҳудудларида яшаб, ижод қилаётган истеъдод эгаларининг ижодини тарғиб этишдан иборатдир.

Ўзбекистон Республикаси Ва­зирлар Маҳкамасининг 2011 йил 3 ноябрда қабул қилинган «Ўзбекистон Республикаси Пре­зидентининг ёш истеъдодлар учун «Ниҳол» мукофоти танловини ташкиллаштириш ишларини такомиллаштириш тўғрисида»ги қарорига кўра, ушбу мукофот учун танлов икки йилда бир марта ўтказилиши кўзда тутилган. Бу юртимизда ғоя­вий-бадиий юксак савиядаги янги қўшиқлар ва мусиқий асар­лар яратиш, истеъдод соҳибларини ҳар томонлама қўллаб-қувватлаш тизимини янада такомиллаштириш ва шу асосда «Ниҳол» мукофотининг нуфузини оширишга хизмат қилмоқда.

2012 йилда ўтган Қорақалпоғистон Республикаси, вилоятлар ва Тошкент шаҳри саралаш босқичларида ёшлар ўз истеъдодини турли ҳудудлар ва юртимизнинг кўзга кўринган мутахассисларидан таркиб топган экспертлар, мусиқашунослар назаридан ўтказди. Дастлабки саралаш босқичларида мамлакатимиз бўйича 12134 на­фар ёш «Ниҳол» мукофотини қўлга киритиш учун ижодий кураш олиб борди. Уларнинг 155 нафари танловнинг республика босқичида иштирок этди.

Жорий йилнинг 14-16 июль кунлари Ўзбекистон давлат консерваториясида бўлиб ўтган танловнинг мамлакат босқичида иштирокчилар мумтоз қў­шиқ, мусиқа ижрочилиги, эстрада, опера, рақс бўйича ўз маҳоратини намойиш этди. Мазкур мукофот соҳиблари ўз йўналишлари бўйича олий ўқув юртига имтиҳон ва тест синовларисиз давлат гранти асосида ўқишга кириш имконияти, «Ниҳол»нинг махсус статуэткаси ва энг кам ойлик иш ҳақи­нинг 70 баробари миқдорида пул мукофотига эга бўлади.

...Саҳнада ижро этилаётган жўшқин мусиқа шўх рақсларга уланади. «Ниҳол»нинг янги соҳиблари номлари тантанали тарзда эълон қилинади. 2013 йилда опера ижрочилиги бўйича Науризбек Махамма­диёров (Қорақалпоғистон Республикаси), Абдулла Ширинов (Қашқа­дарё вилояти), мумтоз қўшиқ йўналишида Элдор Ғуломов (Андижон), Дилфуза Қобилова (Бухоро вилояти), Зулхумор Мамарасулзода (Жиззах ви­лояти), эстрада йўналишида Гўзал Жуманиёзова (Навоий вилояти), Гуласал Абдуллаева (Наманган вилояти), Шерзод Ортиқов, Умида Хўжаева (Тошкент шаҳри), Нодира Абдураҳмонова (Тошкент вилояти), рақс санъати бўйича Феруза Хўжанова (Самарқанд вилояти), мумтоз қўшиқчилик бўйича Умида Ҳамидова (Сирдарё вилояти), Жайҳунбек Матмуродов (Хоразм вилояти), мусиқа ижрочилиги бўйича Қаҳрамон Ғуломжонов (Тошкент шаҳри), Фарғо­на санъат коллежи ўқувчиларининг «Ниҳол» ўзбек халқ чолғулари ансамбли (Фарғона) мазкур мукофотга лойиқ топилди. Уларга диплом ва мукофотлар тантанали тарзда топширилди.

— Президентимиз Ислом Каримов раҳнамолигида мамлакатимизда ёшларнинг камолоти учун барча имкониятлар яратилган, — дейди Науризбек Махаммадиёров. — Бундай эътибор ва ғамхўрлик биз­ни янада кўпроқ изланишга, халқимизга манзур бўладиган бадиий юксак қўшиқлар яратишга ундайди.

Санъат усталари ва «Ниҳол» мукофотининг бу йилги совриндорлари иштирокидаги гала-концерт намойиш этилди.

Тадбирда Ўзбекистон Респуб­ликаси Президентининг Давлат маслаҳатчиси Х.Султонов иштирок этди.

Назокат УСМОНОВА,

ЎзА мухбири.



DB query error.
Please try later.