27.07.2013

ЮРТИМ, ТЎЛДИ ОМБОРЛАРИНГ ЎЗ ДОНИНГ БИЛАН

Мамлакатимиз Президентининг ғаллакорларга табриги катта хирмонга 229 минг тонналик ҳисса қўшган Наманган аҳлини ҳам руҳлантириб, қувонтириб юборди. Сардоба ва Чорсудаги нон бозорларида эса новвойлар байрам бошлашибди. Ғалла режаси ортиғи билан бажарилганини тўкинлик ва фаровонлик омили, деб билган новвойлар нон нархини 150 сўмгача арзонлатишибди.

«Сардоба» бозоридамиз. Савдо авжига чиққан нон расталари оралаб, донгдор Жўрахон новвой ва чекич тамғаси «Марғилон-59» бўлган новвойларни сў­роқладик.

— Жўрахон новвойнинг набиралари бўламан, — деди ўзини Носирхон Худоё­ров деб таништирган новвой йигит. — Новвойлар сулоласидан эканимдан ҳамиша фахрланаман. Мен новвойлар сулоласининг еттинчи авлодиман.

Бугун тандирдан нонни узиб бериб, сав­до растасига яқинлашмайдиган катталаримиз ҳам бозорга келишади. Чунки ғалла режаси бажарилган кунларда биз новвойлар байрам қиламиз. Ахир, рўзғоримиз баракаси, тириклик ва тирикчилигимиз зийнати нон билан, дон билан боғлиқ-да.

— Ғаллачиликдаги муваффақиятни ҳар қанча байрам қилсак ярашади, — дейди уста новвой Умархон Худоёров. — Кечаги замонда отамиз ёпиб берган нонни бозорда хотиржам сотувга қўёлмасдик. Нов­войларни ҳақоратлаб бозордан қувишарди. Саватдаги нонимиз улоқтирилган кунларни эсласам мустақиллик қадрини юракдан ҳис этаман. Отамиз Нурдинхон Худоёров айтиб бергандилар: Сардоба бозори рўпарасидаги тикувчилик фабрикасидан то Ностегирмон даҳасигача бўлган масофада майса ўтларни еб, дарахтларнинг пўстлоғини шимиб, заҳарланиб, қорни шишиб вафот этганлар бўлган. Новвойлар байрами, нон байрами, дон байрами деб нишонла­наётган бугунги байрам аслида шукроналик байрами.

Обинон усталари — Наманганнинг довруғли новвойлари Маъруфбой ва Камолхон Асқаралиевлар билан ўз хонадонларида учрашдик. Тандирдан ҳозиргина узилган гижда патирларни саватларга солаётган Қобилхон, Азимбойларни байрам билан қутладик. Бу сулолада новвойлик Хайриниса она Солиевадан бошланган экан. Дастлаб, Хайриниса она устозлари Маъсудахон патирчидан нон ёпиш, хамир қориш ва уни расм чизгандек ранги ва нақши билан тандирдан чиқариш санъатини ўрганган эканлар.

— Бир кунда 400 донагача гижда нон, патир, гулли патир, гўштли нон ёпиб бозорга чиқарилади. Кеч соат 23да хамир қорисак, саҳарда уни тандирга ёпамиз, — дейди у. Бу ишга жуда тозалик, покизалик билан, қутлуғ ният билан киришилиши керак. Нов­войликнинг бошқа ҳунарлардан улуғлиги ҳам шунда.

Бир пайтлар ширмой нон ва ширмой патир устаси сифатида донг таратган Хайриниса онадан кейинги пайтда нима учун ширмон ёпмай қўйгани сабабини сўрадик.

— Биз ёпадиган оби нонларнинг тайёрлаш меҳнати оғирроқ. Ширмонники яна ҳам мураккаб. Шаҳримизда Маҳмуджон новвой деган яна бир сулола бор. Ширмонни кейинги пайтда ўшалар ёпишмоқда. Арпабодиён, нохот суви, зира суви аралашмаларидан тайёрланадиган ширмон хамиртурушининг хосияти улуғ, ўзига хос юки бор. Бу юкни кўтариш ҳар кимнинг ҳам қўлидан келмайди...

Мамлакатимиздаги тинчлик, фаровонлик, ободончилик, қўйингки, барча юксалишларга юртимиздаги ғалла мустақиллигининг қудратли таъсири бор.

Новвойларнинг байрам сўзини тинглаб, нон байрами, дон бай­рамидаги суҳбатлардан завқ­ланиб, улуғ шоиримиз Абдулла Ориповнинг сатрлари ёдга келади:

Нон ва Ўзбекистон уйқашдир азал,

Бу юртга не эллар нон деб келганлар.

Саргашта қушлар ҳам доим, галма-гал,

Бу юртдан ризқини териб еганлар.

Юртим буюклигинг билди кенг жаҳон,

Тўлди омборларинг ўз донинг билан.

Сийлайсан оламни ёзиб дастурхон,

Меҳнатдан яралган шу нонинг билан...

Носиржон ДЕҲҚОНОВ,

«Ўзбекистон овози» мухбири.



DB query error.
Please try later.