16.07.2013

ФАОЛ АЪЗОЛАР БИЛАН

тадбирлар самарали ва таъсирчан ўтади

Иш вақти тугади. Аммо Ўзбекистон Халқ демократик партияси аъзолари уйларига эмас, «Фарғона Азот» ОАЖнинг маданият саройига шошиларди. Чунки бугун ЎзХДП бошланғич ташкилоти «Қадр-қимматим, таянчим ва ифтихоримсан, мустақил Ўзбекистон» мавзусида амалий семинар ташкил этган. Шу муносабат билан бу ерга кўплаб ёшлар, фаоллар, меҳнат фахрийлари келди.

— Коллежни битириб, шу корхонада иш бошладим, — дейди электрмонтажчи Шерали Мўйдинов. — Иш жараёнида билмаганимни ўрганиб, касб маҳоратимни ошириб боришга ҳаракат қилаяпман. Шу ерда ишлаб, ЎзХДПга аъзо бўл­дим. Келажакда олий ўқув юртига ўқишга кириб, сиёсий-ҳуқуқий билимимни янада ошириш ниятидаман.

Бошланғич  партия ташкилоти етакчиси Ҳурмат Йўлдошевнинг амалий ишлари туфайли қуйи ташкилот сафи тобора кенгайиб бормоқда. 2010 йилда бу ерда партия аъзоси 210 нафар эди, ҳозир улар 572 нафарга етди. БПТ корхона жамоаси ўртасида сиёсий ўқув, семинар, турли мавзудаги кўрик-танлов ҳамда байрам тадбирлари ташкилотчиси. Хусусан, «Ёш мутахассислар – корхона таянчи», «Биз – ёш сиёсатчилар» мавзуларидаги баҳс-мунозаралар ёшларни партия ташкилоти атрофида янада жипс­лаштирмоқда. Бундан руҳланган бошланғич партия ташкилоти аъзолари сиёсий-ҳуқуқий, маърифий ўқувларни ҳам мунозара, эркин фикр алмашиш услубида ўтказмоқда.

Мунтазам равишда «Кучли ижтимоий сиёсат – Халқ демократик партияси сиёсий мафкурасининг пойдевори», «Партия дастурида обод турмуш тарзи ва оилалар фаровонлигини таъминлаш масалалари», «Маънавият – инсоннинг улғайиш ва куч-қудрат манбаи», «ЎзХДП электоратининг манфаатларини ўрганишнинг шакл ва услубларини такомиллаштириш», «Ҳуқуқий билимни кенгайтиришда партия фаолияти самарадорлигини ошириш» каби мавзуларда семинарлар ташкил этиб келинади. Уларда партия фаоллари, депутатлар, ҳуқуқшунос ва сиёсатшунослар иштирокини таъминлашга алоҳида эътибор қаратилади.

Тадбирларнинг жонли ўтишида, айниқса, бу ердаги хотин-қизлар қўмитаси, касаба уюшмаси, «Камолот» ЁИҲ­нинг бошланғич ташкилотлари билан ҳамкорлик қўл келмоқда. Бундан ташқари, бошланғич партия ташкилоти ЎзХДП Фарғона шаҳар кенгаши, халқ депутатлари шаҳар Кенгашидаги депутатлик гуруҳи билан бақамти иш олиб боради. Депутатлар ўтган сессияларда кўриб чиқилган масалалар, миллий қонунчилигимизга киритилаётган ўзгаришлар мазмун-моҳиятини партия аъзолари, электорат вакилларига мунтазам етказиб боради.

— Сиёсий партиянинг ҳақиқий кучи унинг бошлан­ғич ташкилотларида, — дейди Ҳурмат Йўлдошев. — Шунинг учун асосий эътиборни партия аъзоларининг сиёсий-ҳуқуқий билимини ошириш, партия ғоя ва мафкурасини кенг тарғиб этиш, юртимизда кечаётган ислоҳотларга дахлдорлик туйғусини шакллантиришга қаратаяпмиз. Бугунги тадбир ҳам шу мақсадга хизмат қилади.

Муҳаммаджон ОБИДОВ,

«Ўзбекистон овози» мухбири.



DB query error.
Please try later.