09.07.2013

ДАСТЛАБКИ МЕДАЛЛАР ВА ИЛК ҒАЛАБАЛАР

Қозон шаҳрида XXVII Бутунжаҳон ёзги универсиадаси баҳслари қизғин давом этмоқда. Мусобақаларнинг дастлабки кунги беллашувлари ҳамюртларимиз учун муваффақиятли кечди.

Универсиада дастуридан жой олган белбоғли кураш бўйича бир йўла икки нафар полвонимиз совриндорлар сафидан жой олди. Зайлобиддин Ортиқов (75 кг), Нозимжон Иброҳимжонов (90 кг) бронза медаллари билан тақдирланди.

Мусобақанинг дзюдо беллашувларида Ўзбекистон терма жамоаси энг сара таркиб билан иштирок этмоқда. Дзюдочимиз Соиб Қурбонов (100 кг) ҳам шоҳсупанинг фахрли учинчи поғонасига кўтарилди. Ҳамюртимиз биринчи беллашувда бразилиялик Рафаэль Бузаккаринига имкониятни бой берганди. Бироқ Соиб ўтиш турнирида япония­лик Рюко Огава, германиялик Дино Пфайффер, қирғизис­тонлик Болот Токтогоновни мағлуб этди. Бронза медали учун кечган баҳсда жанубий кореялик Шим Жи Хо устидан ғалаба қозонди.

Универсиада дастуридан жой олган бокс учрашувлари ҳам барчанинг диққат марказида турибди. Унда дунёнинг ўттиз олти давлатидан келган 160 нафар боксчи ғолиблик учун рингга кўтарилмоқда. «Чарм қўлқоп» усталаримиз ҳозиргача ўтган баҳсларнинг барчасида ғалаба қозонганликлари қувонарлидир.

Энг енгил вазн тоифасида Ватанимиз шарафини ҳимоя қилаётган Ҳасанбой Дўстматов (49 кг) нимчорак финалда озарбайжонлик Араз Имамакиевни, чорак финалда эса тожикистонлик боксчи Файзмамат Малахбековни мағлуб этиб, ярим финалга йўлланма олди. Ҳасанбой  бугун финал йўлланмаси учун кечадиган жангда Ган-Эрден Ганхуяг (Мўғулистон)­га қарши рингга кўтарилади. 

Шунингдек, боксчиларимиздан Жасурбек Латипов (52 кг), Фазлиддин Ғойибназаров (60 кг), Санжарбек Раҳмонов (64 кг), Хуршидбек Норматов (69 кг), Азизбек Абдуғофуров (75 кг) ва Рустам Тўлаганов (91 кг) ҳам дастлабки бос­қич баҳсларида муваффақият қозониб, кейинги босқичга йўлланмаларни қўлга киритишган.

Яна бир иқтидорли боксчимиз — Лондон олимпиадаси қатнашчиси, 2010 йилги Осиё ўйинлари ғолиби Элшод Расулов (81 кг) нимчорак финалда италиялик ­Симоне Фиорини катта устунлик билан енг­ди. Энди Элшод чорак финалда озарбайжонлик Рауф Раҳимовга қарши ринг­га кўтарилади. 

Эслатиб ўтамиз, мазкур нуфузли мусобақада жами 55 нафар ҳамюртимиз спортнинг белбоғли кураш, бокс, бадиий гимнастика, байдарка ва каноэда эшкак эшиш, оғир атлетика, дзюдо, эркин ва юнон-рум кураши, енгил атлетика, самбо турлари бўйича қатнашмоқда.

(Ўз мухбиримиз)



DB query error.
Please try later.