06.07.2013

ДЕПУТАТНИНГ ИШ КУНЛАРИ

қандай ўтаяпти?

Ҳаким Номозов ЎзХДП Мирзачўл туман кенгашидаги Жамоатчилик қабулхонасида фуқароларни қабул қилаётганда бир йигит кириб келди.

– Иш излаб юрувдим, – деди у. – Бир танишим шу ерга мурожаат қилишимни маслаҳат берди.

Депутат йигит билан бафуржа суҳбатлашди. Унинг вақтинча ишсизлиги, ишлаш нияти борлигини, оилавий аҳволини ўрганди. Туман бандликка кўмаклашиш ва аҳолини ижтимоий муҳофаза қилиш маркази билан ҳамкорликда ишлаб чиқилган режага кўз югуртиргач, фермер хўжаликда иш юритувчи бўлиб ишлайсизми, деб сўради.

– Ишлайман, – деди йигит ишонч билан.

Орадан бир неча кун ўтгач, Рустамжон Қурбонов тумандаги «Бекзод» фермер хўжалигида иш бошлади.

Ҳаким Номозов халқ депутатлари туман Кенгашидаги ХДП депутатлик гуруҳининг навбатдаги йиғилишига ҳо­зирлик кўраяпти. Остонада «Ипак йўли» маҳалласи ҳудудий партия ташкилоти етакчиси Рамазон Боқиев кўринди.

— Хуш кўрдик, — уни илиқ қарши олди депутат.

— Қишлоқ врачлик пунктини янги тиббий асбоб-ускуналар билан жиҳозлаш, бирламчи тиббий ёрдам сифатини янада яхшилаш ҳақидаги масалани ўрганиб чиқиш ва уни иложи бўлса туман Кенгаши сессияси муҳокамасига киритиш таклифи билан келдим, — деди Рамазон ­Боқиев.

— Доим бирон-бир таклиф, ташаббусни бошлаб юрасизда, — мамнун жилмайди Ҳаким Номозов. — ЎзХДП туман кенгаши раиси сифатида ҳам, депутатлик гуруҳи раҳбари сифатида ҳам бу таклифни қўллаб-қувватлайман.

Гап бир жойдан чиқди. Тез орада ишчи гуруҳи тузилди ва масала атрофлича ўрганилди. Аввал, депутатлик гуруҳи, сўнг тегишли доимий комиссия йиғилишида муҳокама қилинди. Муҳокама натижалари бўйича масалани йил охирида халқ депутатлари Мирзачўл туман Кенгаши сессиясига киритишга келишиб олинди.

Туман партия кенгаши етакчиси ўз хонасида ЎзХДП сафига қабул қилишни сўраб ёзилган аризалар билан танишаётганди. Мирзачўл Агроиқтисодиёт касб-ҳунар коллежи ўқувчиси Наргиза Қувватованинг фикрлари эътиборини тортди:

«Мамлакатимизда 4 та сиёсий партия фаолият кўрсатаётганидан хабарим бор. Юртимиз ҳаётида уларнинг ҳар бирининг ўз ўрни бор. ЎзХПД ғояси, дастурий мақсадлари билан танишгач, булар менинг ҳаётий қарашларим, мақсад-муддаоларимга мос келишини англадим. Шу боис мазкур партияни танладим ва унга аъзо бўлишга қарор қилдим».

Шу куни Наргиза билан яна 3 нафар киши ЎзХДП сафига қабул қилинди.

Депутат Ҳаким Номозовнинг иш кунлари ана шундай тиғиз ўтади. У бу кунларнинг ҳар соати, ҳар дақиқасидан ўринли ва унумли фойдаланишга ҳаракат қилади. Ҳар тонг уни 21 та бошланғич ташкилот фаолиятидан мунтазам хабардор бўлиш, уларни партиямизнинг чинакам таянчларига айлантириш, халқ депутатлари туман Кенгашига ХДПдан сайланган 13 нафар депутатни бирлаштирган депутатлик гуруҳи ишига раҳбарлик қилиш, сайловчилар билан учрашиб, уларнинг қонуний манфаатларини ҳимоялаш, электоратни ўйлантираётган масалалар ечимини фаоллар билан биргаликда ўрганиш сингари кўпдан-кўп юмушлар кутиб туради.

— Депутатликка шунчаки мартаба, мансаб деб қараш мутлақо нотўғри, — дейди Ҳаким Номозов. — Бу зиммага олинган юксак масъулият. Шуни ҳис қилиб яшамасак, меҳнат қилмасак, фидойи, фаол, ташаббускор ва қатъиятли бўлмасак, кўзланган мақсадга ета олмаймиз. Ўзим депутатлик фаолиятимда шуларга амал қилишга интиламан, депутатлик гуруҳимиз аъзоларини ҳам шунга даъват этаман. Натижада катта-кичик амалий ишларимиз кўпайиб, хайрихоҳларимиз сафи кенгаймоқда. Булар ўз навбатида ЎзХДП Мирзачўл туман кенгашининг мавқеига ҳам ижобий таъсир кўрсатаётир.

Иброҳим ЖОНУЗОҚОВ,

«Ўзбекистон овози» мухбири.



DB query error.
Please try later.