28.06.2013

«ДИЙДОР ШИРИН, УНИ ҒАНИМАТ БИЛИНГ»

У телебошловчи сифатида юртдошларимиз қалбидан жой олганига анча бўлган. Бугунги кунда эса НТТ каналида бири-биридан қизиқарли «Дийдор ширин» кўрсатувини тайёрлаб, телетомошабинларга тақдим этиб келмоқда. Биз касб байрамимиз арафасида шу кўрсатув муаллифи ва бошловчиси, журналистика соҳасида «Олтин қалам» миллий мукофоти совриндори Насиба МАҚСУДОВА билан учрашдик.

— Аввало, сизни Матбуот ва оммавий ахборот воситалари ходимлари куни байрами билан табриклаймиз. Келинг, бугунги суҳбатимизни «Дийдор ширин» кўрсатуви ҳа­қида бошласак.

— Биласиз, бугун телеканал­лар ва қизиқарли кўрсатувлар кўп. Лекин улар орасида 40-50 ёшдан ошган телетомошабинларга мўлжалланганлари қанча? Ахир, уларнинг ҳам севимли қаҳрамонлари, санъаткорлари, соғиниб кутадиган инсонлари бор-ку?! Бу фикримни ҳамкасбларим ҳам қўл­лаб-қувватлашди ва илк кўр­сатув 2008 йилда «Соғинч» но­ми билан эфир юзини кўр­ди. Ке­йинчалик «Дийдор ширин» деб номладик. Аввал кўрсатувни Ўзбекистонда хизмат кўр­сатган артист Козим Қаюмов, ке­йин телебош­ловчи ва хонанда Толибжон Исроилов, ҳо­зирги кунда эса Ўзбекистонда хизмат кўрсатган ма­да­ният ходими Муслимбек Йўлдошев билан бирга олиб бораяпмиз.

— Кўрсатув ҳақида телетомошабинлар фикр-мулоҳазалари билан қи­зиқиб борсангиз керак.

— Тўғри, таниш-билиш, ҳамкасблардан фикрларини сўраб турамиз. Лекин мухлислардан хатлар келиб туради, қўнғироқлар бўлади. Радио ва теле­видениеда, театр ва кинода кўп йиллар ижод қилган таниқ­ли устоз санъаткорларимиз бор. Уларни кўрсатувга олиб чиққанимизда, мухлислардан роса қўнғироқлар бўлди. Ҳат­то шундай хат келди. «Анчадан буён бетоб бўлиб ёт­ган отам, кўрсатувингизда ўзи севган таниқли кекса санъат­корни кўриб, ие, у киши ҳали бардам экан-ку деб, касалликни енгиб соғайиб кетдилар».

Дарҳақиқат, таниқли санъаткорларимизни соғинганлар кўп. Ҳар бир кўрсатувда улардан бирини эслаймиз, фарзандлари, шогирдларининг гапларини, воқеавий ҳикоя­ларини тинглаймиз. Бу кўпчиликка қизиқ. Айрим инсонларнинг армонлари бўлади. Масалан, «Мухлислар куйлаганда» деган саҳифамиз орқали саҳнани орзу қилган, лекин чиқа олмаган мухлислар қўшиқ айтишади. Улар орасида 90 ёшли отахонлар ҳам бор. Бошқа бири шеър ўқий­ди. Бир аёл 65 ёшга кирганида қўлига қалам олиб расм чизганини намойиш қилди. Ана шундай умид билан яшаётган одамларни биз ибрат қилиб кўрсатишимиз керак. Кўрсатувимизда ёшлар саҳифаси ҳам бор. Бунда санъат ёки бошқа соҳаларда ижод қилиб келаётган истеъдодли ёшлар фаолияти билан таништирамиз.

— Кўрсатувнинг янада қизиқарли бўлиши учун қандай лойиҳаларни режалаштиряпсизлар?

— Кўпчилик мухлисларимиз бизга мурожаат қилишади, маслаҳат беришади, ўз-ўзидан янги ғоя, лойиҳалар пайдо бўлади. Масалан, «Қўшқанотлар», «Бир сурат тарихи», «Бир қўшиқ тарихи» каби саҳифаларимиз шундай тарзда юзага келди. Кўрсатувга олим­ларни, шоирларни, ёзувчиларни ва бошқа соҳа вакилларини таклиф қилиб, эркин мавзуларга кенг ўрин берамиз. Уларда томошабинларни қи­зиқтирган саволларга жа­воб олишга ҳаракат қиламиз.

Эндиликда кўрсатувни ви­лоятларда ҳам тасвирга олмоқчимиз. Асосан қишлоқ одамларининг турмуш тарзи, қувонч-шодликлари, умуман мустақиллик аталмиш олий неъмат оддий одамларимиз ҳаётида, тақдирида қандай ифода топаётгани тўғрисида кўрсатувлар тайёрламоқчимиз.

— Тажрибали бошловчи сифатида ёш ҳамкасбларингизга қандай маслаҳат берасиз.

— Бизнинг касбимиз сўз билан боғлиқ. Адабий тилимиз бой имкониятларидан қанча кенг фойдаланиб, халқона ибораларни қўлласак, томошабинлар олдида шунча ҳурматимиз ошади. Телебошловчилик машаққатли меҳнатни талаб этади. Ҳамиша ижодий изланишимиз керак. Ёш ҳамкасбларимизга маслаҳатим томошабин олдидаги масъулиятни ҳеч қачон унутишмасин.

Барча ҳамкасбларимга машаққатли ва шарафли ишимизда ҳамиша муваффақиятлар ёр бўлишини тилайман.

«Ўзбекистон овози» мухбири

Альбина ЖУМАНОВА суҳбатлашди.



DB query error.
Please try later.