06.06.2013

НАФОСАТ ВА МАҲОРАТ НАМОЙИШИ

Пойтахтимизда бадиий гимнастика бўйича Осиё чемпионати ва «Happy Caravan» халқаро турнири қизғин давом этмоқда. Бадиий гимнастика бўйича олимпия захиралари республика болалар-ўсмирлар ихти­сослашган спорт мактабида  ўтказилаётган мазкур нуфузли мусобақада Ўзбе­кистон, Жанубий Корея, Япония, Хитой, Сингапур, Малайзия, Таиланд, Ҳин­дистон, Мўғулистон, Қозоғистон, Қирғизистон, Исроил, Россия  сингари ўн бешга яқин давлат спортчилари ғолиблик учун майдонга чиқишаётир.

— Бугун Ўзбекистонда кўп­лаб соҳалар сингари спортни, жумладан, болалар ва хотин-қизлар спортини ривожлантиришга қаратилаётган юксак эътибор алоҳида эътирофга сазовордир, — дейди Осиё гимнастика иттифоқи пре­зиденти Раҳмон ал-Шатрий. — Охирги йилларда юртин­гизнинг бадиий гимнастика бўйича нуфузли мусобақа­ларга муносиб мезбонлик қи­либ келаётганлигини алоҳида таъкидлашни истардим. Тошкент шаҳри 2004, 2005, 2011 ва 2012 йилларда бадиий гимнастика бўйича Жаҳон кубоги босқичлари, 2010 йилда ўс­мир қизлар ўртасида Осиё чемпионатига мезбонлик қил­ди. Осиё гимнастика иттифоқи ўзининг Бош ассамблеясини 2012 йилда Ўзбекистон пойтахтида ўтказгани ҳам юртингизда ушбу спорт тури ривожланаётганининг халқаро эътирофидир.

Осиё чемпионатида қитъамизнинг энг кучли гимнастика­чилари, «Happy Caravan» халқ­аро турнирида эса ўсмир қизлар яккалик ва гуруҳ баҳсларида арғамчи, ҳалқа, тўп, булава, тасмада машқ бажариш ҳамда кўпкураш бўйича ўз истеъдод ва маҳоратини намо­йиш қилишяпти. Халқаро ҳа­камлар бригадаси эса гимнас­тикачилар бажарган композицияларни уч йўналиш — ижро маҳорати, артистизм ва машқ­нинг мураккаблиги бўйича баҳолаб боришмоқда.

Мусобақаларда мутахассисларимиз Жамила Раҳматова, Майя Филиппова, Мафтуна Шамсиева, Валерия Давидова, Луиза Ғаниева, Зарина Қурбонова, Дарья Свечникова каби моҳир гимнастикачиларимизга ишонч билдиришган.

Мусобақаларнинг биринчи куни «Happy Caravan» халқаро турнирининг яккалик кўпкураш баҳсларида саккиз мамлакат вакиллари ҳалқа ва тўпда машқ бажариш бўйича беллашди. Иқтидорли гимнас­тикачимиз Равиля Фархуддинова ҳалқада машқ бажариш бўйича 15,4 баллни қўлга киритди. Ушбу баҳсда қатнашган яна бир спортчимиз Жасмин Юсупованинг чиқиши 14,7 баллга лойиқ топилди.

Шунингдек, тўп билан машқ бажаришда Комила Саидхонова 14,45, Сабина Тошкенбоева 13,25 балл жамғарди.

(Ўз мухбиримиз.)



DB query error.
Please try later.