30.05.2013

ТАШАББУС, ФИДОЙИЛИК, ИНТИЗОМ ВА МАСЪУЛИЯТ

фаолиятимиз мезонига айлансин

Бугун Жиззах шаҳрида 1586 нафар ЎзХДП аъзоси бўлиб, улар 62 та бошланғич ташкилотга уюшган. «Ёшлик» маҳалласида фаолият юритаётган партия ташкилоти шуларнинг биридир.

Яқинда 36 нафар партиядошимизни бирлаштирган ушбу бошланғич ташкилотнинг ҳисобот-сайлов йиғилиши бўлиб ўтди. Унда ташкилотнинг ҳисобот давридаги фаолияти таҳлил этилди.

Ҳисобот даврида партия сафига 16 нафар янги аъзо қабул қи­линди. Уларнинг аксарияти хотин-қизлар ва ёшлардан иборат. Фуқароларнинг ҳуқуқий билим­ларини оширишга йўналтирилган 2 та, маҳалладаги ижтимоий-маънавий муҳитни соғломлаштириш, диний ақидапарастликнинг олдини олишга қаратилган 3 та, партия Ҳаракат дастури ижроси бўйича 3 та, соғлом турмуш тарзига оид 4 та тадбир ўтказилди. Уларнинг таъсирчанлиги, самарадорлигини оширишга алоҳида аҳамият берилди. Маҳалла ҳудудида янги иш ўринлари ташкил этиш, бандликка кўмаклашиш, аҳолига сервис хизмати кўрсатишни яхшилаш масалалари пар­тия фаоллари доимий эътиборида бўлди. Натижада маиший хизмат шохобчалари кўпайди, 8 та сервис хизмати кўрсатиш объекти фойдаланишга топширилди. Бу эса ўнлаб янги иш ўринлари яратиш, аҳоли турмуш фаровонлигини янада яхшилаш имконини берди.

Маҳаллада истиқомат қилаётган эҳтиёжманд фуқароларни ижтимоий қўллаб-қувватлаш борасида амалга оширилаётган ишларга алоҳида тўхталиб ўтилди. 34 нафар жисмоний имконияти чекланган, 79 нафар кам таъминланган ва 17 та боқув­чисини йўқотган оилага ҳар томонлама ёрдам кўрсатилиши­да БПТ ташаббускорлиги, партия фаолларидан Раъно Холиқова, Хосият Пармонова, Олим Нишонов, Шокир Қурбоновнинг хизматлари катта бўлгани эътироф этилди.

Йиғилишда ҳисобот даврида маҳаллада амалга оширилган кўпгина ижобий ишлар қайд этилиб, ҳали ҳал этилмаган муаммоли масалаларнинг ҳам мавжудлигига эътибор қаратилди. Уларни бартараф этишда бошланғич партия ташкилоти ўз ўрни, позицияси, таъсирини кўр­сатиши зарурлиги таъкидланди. Маиший ва коммунал соҳалар, ободонлаштириш тадбирларида партиядошларимиз иштироки, фаоллиги бир хил эмаслиги айтилди. Партия ғоялари, дастурий мақсадларини одамлар орасида тарғиб қилиш ишлари ҳам талаб даражасида эмаслиги тўғрисида фикрлар билдирилди.

— Бошланғич ташкилот партия электоратига яқинлиги туфайли унинг манфаатларига тааллуқли муаммолардан яхши хабардор бўлиш имконини беради, — дейди маҳалла фуқаролар йиғинининг диний маърифат ва маънавий-ахлоқий тарбия масалалари бўйича маслаҳатчиси, ЎзХДП фаоли Хурсаной Иномова. — Биз бундай муаммоларни қачон, ким ҳал этар экан, деб кутиб ўтирмасдан, уларни мунтазам ўрганиб, таҳлил қилиб боришимиз, бу ишга маҳаллий Кенгаш депутатлари эътиборини қаратишимиз лозим. Ташаббус ва фидо­йилик, интизом ва масъулият ҳар бир партиядошимиз фаолиятининг мезонига айланиши зарур.

Ҳисобот-сайлов йиғилишида Хосият Пармонова оилавий шароити сабабли ўз аризасига кўра, бошланғич партия ташкилоти етакчилигидан озод этилди. ХДП фаоли Олим Нишонов бошланғич ташкилот раиси этиб сайланди.

Иброҳим ЖОНУЗОҚОВ,

«Ўзбекистон овози» мухбири.



DB query error.
Please try later.