21.05.2013

БЕШ ҚИТЪАНИ БИРЛАШТИРГАН ТУРНИР

Ҳар икки йилда ўтказиб келинаётган мазкур турнир бу йил жаҳоннинг қирққа яқин дав­латидан 150 га яқин полвон, ҳакам ва меҳмон­ларни Жайҳун соҳилига жам қилди. Соврин жамғар­маси 20 минг АҚШ долларини ташкил қилган мусо­бақада пол­вонлар 66, 81 ҳамда мутлақ вазн тоифа­сида кураш олиб борди.

Ўн минг томошабинга мўлжалланган «Сурхон» спорт мажмуаси кураш ихлосмандлари билан тўлиб-тошди. Стадион атрофида барча иштирокчи давлатлар байроқлари осмонимиз узра ҳилпиради.

Халқаро турнирни Сур­хондарё вилояти ҳокими ­Нормўмин ­Чориев кириш сўзи билан очиб, йиғилганлар ва меҳмонларни қизғин му­боракбод этди. Ватанимиз ­мад­ҳияси янгради. Шун­дан сўнг, Кураш халқаро ас­со­­циацияси президенти Комил­жон­ Юсупов ушбу кураш байрами билан барчани табриклаб, иштирокчиларга омад тилади. 

19 май куни эрталаб мусобақалар бошланди. Даст­лаб, ёш ва фахрий полвонларнинг кўргазмали чиқишлари намойиш қилинди. Ғолибларга эсдалик ва қимматбаҳо совғалар топширилди. Махсус сертификатлар тақдим этилди. Шундан кейин 66 ва 88 килограмм вазндаги полвонлар кураш бошлади.

66 килограмм вазнда барча рақиблари устидан соф ғалабага эришган  сурхондарёлик Шарофиддин Лутфуллаев 1-ўринни эгаллаган бўлса, 2-ўрин қозоғистонлик Ирисқул Абдурасуловга насиб этди. Бронза медаллари билан Таиланд ҳамда Хитойдан келган полвонлар тақдирланди.

— Хитойда кўпчилик ёшлар дзюдога меҳр қўйган, — дейди Чан Кай Фенг жаноблари. — Аммо кураш федерацияси ташкил этилгач, қизиқувчилар сони  кўпайди. Жаҳон чемпионатларида юқори ўринларни эгаллаётган полвонларимиз бор. Бугун мамлакатимиз спортчиси бронза медалини қўлга киритди.

Полвонларнинг ҳар бир беллашуви мухлислар томонидан олқишлаб турилди. Айниқса, 81 килограмм вазн тоифасида ўтказилган мусобақалар муросасиз ва кескин баҳс­ларга бой бўлди. Асосий ўринлар учун кураш ҳамюртларимиз қатори Жанубий Корея, Ҳиндистон, Хитой, Қозоғистон ва тожикистонлик курашчилар ўртасида кечди. Узоқ давом этган беллашувлардан кейин ўзбекистонлик Бекзод Тўрабоев  ва қозоғистонлик Ўлжас Кенеханов финалда рўбарў келди. Рақибини 20 сония­даёқ соф ғалаба билан мағлубиятга учратган юртдошимиз мазкур вазнда ғолиб деб топилди ҳамда олтин медалга сазовор бўлди. Конголик ва тожикистонлик спортчилар эса шоҳсупанинг 3-поғонасидан жой олди.

Куннинг иккинчи ярмида гиламга мутлақ вазн тоифасидаги полвонлар чиқди. Дастлабки баҳсларданоқ Ўзбекистон, Россия Фе­де­рация­си, Эрон ва Тожикистон Республикаларидан келган полвонлар мутлақ вазн­да асосий даъвогар эканлиги маълум бўлди.

Мусобақанинг финалида Ўзбе­кис­тоннинг номдор полвонларидан бири Самижон Убайдуллаев тожикистонлик Парвиз Собиров билан рўбарў келди. Қизғин кечган баҳсда Самижон Убайдуллаев устун келди ва Ҳаким ат-Термизий хотирасига бағишлаб ўтказилган бу йилги турнирнинг мутлақ ғолиби, деб топилди.

— Бу ажойиб спорт турининг келажакда Олимпия ўйинларига киритилишига ишонаман, — дейди Халқ­аро Олимпия қўмитаси аъзоси, польшалик Ирена ­Шевинска. — Чунки кураш қисқа давр­­да беш қитъа, 120 дан ортиқ мамлакатда оммалашди. Бунда Ўзбе­кистон Республи­ка­си ­Пре­­зиденти Ислом ­Каримовнинг чексиз хиз­матлари бор.

— Ўн йилдан буён мураббийлик қиламан, — дейди ҳиндистонлик Рави Капур. — Мамлакатимизда курашга қизиқувчилар сони йил сайин кўпаймоқда. Айни кунларда 20 минг нафардан ортиқ йигит-қиз мунтазам шуғулланиб келаяпти. Термизга иккинчи бор келишим. Ушбу турнир полвонларимиз учун тажриба ошириш, унинг сир-синоатлари билан яқиндан танишиш имкониятини яратди.

— Бугунги беллашувларни Қўмитамиз аъзолари кузатиб борди, — дейди шу йилнинг ёзида Инчеон (Жанубий Корея)да ёпиқ спорт иншоотларида бўлиб ўтадиган Осиё ўйинлари ташкилий қўмитаси аъзоси Чо Хеунг Кеун. — Ўзбек курашининг Осиё ўйинларига киритилишига ва дунё халқларининг севимли спорт турига айланишига ишонаман.

— Халқаро турнир ҳақида дунёнинг юзлаб мамлакатлари бевосита хабардор бўлди, — дейди ­Хитойнинг «Синьхуа» ахборот агент­лиги мухбири Дун Лунцзян. — Кураш асосида мардлик, чаққонлик ва ҳалоллик ётади. Бугун дунё полвонлари қадимий ­Термизда йиғилиб, курашнинг жозибадорлигини яна бир бор намойиш қилди. Халқингизнинг курашга бўлган муҳаббати мени қойил қолдирди. Стадионда 7 ёшдан 70 ёшгача бўлган ишқибозлар полвонларнинг ҳар бир ҳаракатини ҳайқириқлар билан қувватлаб турди.

Акбар ЖОНУЗОҚОВ,

Абдумалик ҲАЙДАРОВ,

«Ўзбекистон овози» мухбирлари.



DB query error.
Please try later.